كتبت بقوقل “مواقع قديمه” قصدي “مواقع الكترونية قديمه” طلعتلي هالصورة!

دراستي الجامعيه بالخارج خدمتني ( <== والله انها ما خدمته ولا قالها ربي  .. وهالنقطه أصلاً ذكرها في الموضوع ما منه أي فايده بس عدوها انتم عاد  ) .. وهالشي كان له الأثر البالغ في تفتيح مداركي العقلية على قابلية الاستخدام … إلخ ( إلخ: كلمه يقولها الواحد إذا توهق وما قدر يسهب أكثر في الشرح  ) أو اليوزابيليتي Usability إذا حبينا نكون أكثر تحديد  ( <== لا ظلمناك .. طلعت فاهم  ) .. وصرت أفهم طبعاً بهالسوالف  ( <== واضح  ) ..

وسأستشهد بقصة واقعيه قصيرة مررت بها أنا شخصياً وأعوذ بالله من كلمة أنا ( <== العن ابو التواضع يا شيخ  ) تؤكد بأني فاهم  .. تناقلوها يا إخوان وتوارثوها جيلاً عن جيل وقصوها على أطفالكم قبل النوم وسجلوها في كتب الأدب والتاريخ مع ذكر المصدر  .. واعلموا أنها قصة مليئة بالحكمة والعبر .. فاقرؤوها واعتبروا ..

قصة قصيرة للأطفال قبل النوم +18

كان يا ما كان في قديم الزمان وفي سالف العصر والأوان كنت قاعد أشيّك على ايميلي قبل كم شهر ولقيت عندي ايميل اسم مرسله “عذرية للبيع” ! ..

كنت فاضي ( <== يعني بالعاده مشغول مثلاً؟!  .. أصلاً فاضي هذي الحالة الافتراضية حقتك  ) ففتحت الايميل أبي أشوف وش آخرتها فتفاجأت بأنه مجرد ايميل إشهار أو سبام أو سخام ( على قولة بعض المعربين ) لمنتدى غبي آخر على الشبكة العنكبوتية .. هالني ما رأيت .. فقد كانت الرسالة مليئة بروابط لِخَمَّةْ مواضيع مع أبرز عناوينها ..

دفعني فضولي للضغط على رابط موضوع “مراهقة تعرض عذريتها للمزايدة في الانترنت” لأعرف بعدها بأن المنتدى اسمه “أحبك موت” ( حبك برص ) .. وعرفت كذلك بأن هالخبر الإباحي مكتوب في منتدى “أحبك السياسي للقضاياء السياسيه” .. وبغض النظر عن وش دخل هالموضوع في القضايا السياسية ركزولي تكفون على الهمزة الي بكلمة قضاياء .. ثم عرفت أخيراً بأن المحتوى مخفي ويبيلي أحط رد علشان يظهر لي هالمحتوى .. وعلشان أقدر أحط رد عندهم لازم أسجل عضوية .. واذا سجلت عضوية لازم أروح أفعل نفسي من ايميلي بعد علشان أقدر أشارك .. إلخ  ( <== هو بقى شي يومك تقول إلخ ؟! )

لم أجد بُدّاً من التسجيل لديهم فسجلت عضوياء بالمنتداء ( يعني عضويه بالمنتدى ) .. ورحت فعلت عضويتي من الايميل .. وبعدين رجعت للموضوع وكتبت رد على الموضوع مع اني ما أدري وش يتكلم عنه الموضوع بس هذي هي قوانين المنتدى! .. ثم اكتشفت بعد ذلك كله بأن رتبتي كعضو جديد عندهم هي “أحبك جديد” ..

ما عرفت وش اكتب رد على موضوع ما أعرف عن محتوياته أي شي ولا حتى قيد أنمله  .. ولكن كان هناك حل بديل وهو اني أكتب الرد تعقيب على عنوان الموضوع فكتبت ”مشششكككككررررر خااااالللللللللصصصصص .. كثرلنا تكفى من هالاخبار الإباحية ” .. انكشفت لي بعد ذلك محتويات الموضوع المخفيه .. وطبعاً أي واحد ما عنده خبره راح يتوقع ان هالمحتوى المخفي راح يكون شي رهيب وغريب جداً .. ولكن ليس هذا ما وجدته بل وجدت ان الصورة المدرجة بالخبر أو الموضوع لا تمت للفتاة التي يتحدث عنها الخبر بأية صلة قرابة سوى انهم الثنتين ينتمون إلى العرق الشرق آسيوي! .. ثم اكتشفت بعد ذلك أن كاتب الموضوع هو الأخ “حطام الذكريات” “مدير المنتدى” بكبره والمعروف ايميليا بالاسم الحركي الأخت “عذرية للبيع” المحترمه .. ومع ذلك كان حاط الخبر الإباحي في منتدى القضايا السياسية! أو على حد قول مدير المنتدى: القضاياء السياسياء ..

وبعد التسجيل وكل هالمعاناة السابقة الي مريت فيها خطوة بخطوة علشان أقرا هالخبر الي خيُّل لي في البداية أنه مهم .. اكتشفت بالأخير ان الخبر منقول حرفياً من موقع اخباري غير معروف .. واكتشفت بأني ما استفدت أي شي يُذكر من وراء قرائتي للخبر .. غير اني يمكن تلقيت تدريب عملي على تمالك زمام النفس عند الغضب من وراء هالتجربه الفريده .. فرحلت تاركاً هالمنتدى ورائي بلا رجعة غير مأسوف عليه ..

ولكن بعد كم يوم بينما كنت قاعد أتجول بالنت أبحث عن شغله مهمه عن طريق محرك البحث الشهير قوقل ( الشغله المهمه رابط أغنية ) وجدت نفسي فجأة في موقع هابط آخر لا يختلف كثيراً عن منتديات “أحبك موت” ولكن تصميمه كان احترافي  ..
شوفوا الاحترافيه في التصميم بالله وتعلموا  ..
7

^
ترى صحن الشكشوكة هذا يسمونه تصميم احترافي

وإذا بي أجد نفسي وجهاً لوجه مع هذا البنر الإعلاني الإباحي! ..

فارتفع مستوى الأدرينالين عندي وبدأت أتنفس بصعوبه وحبيبات العرق أخذت تتصبصب باردةً على جنبات رأسي وزغللت عيناي من هول وبشاعة هذه الجريمه في حق الاعلامية حليمه بولند .. أوكيك صحيح انه ابعادها عن الساحة الإعلامية شيء جميل ويبشر بالخير بس مهوب بهالطريقة الوحشية ..

تحاملت على نفسي واستجمعت شجاعتي وبيد مرتعشه ضغطت على البنر لأجد نفسي من جديد في الواجهة الرئيسية لمنتديات “أحبك موت” .. صدقوني فقط الواجهة الرئيسية للمنتديات  .. ما كان هناك أي شيء آخر غير الواجهة الرئيسيه بكل ما تعنيه الكلمه!!  ..

ولكم أن تتخيلوا حجم خيبة الأمل التي أُصبت بها بعد أن عرفت بأن الأخت حليمة بولند ما زالت موجودة على الساحة الإعلامية ولا انذبحت ولا شي  !!

بعدها تملكني الغضب تملكاً شديداً بسبب استخفاف مدير منتديات “أحبك موت” بعقولنا، فها هو تارةً يستخف بعقولنا عن طريق رسائل السخام وها هو تارةً أخرى يستخف بعقولنا عن طريق بنرات إباحية لا تمت للواقع بصلة! .. فبحثت عن قلمي حتى وجدته ولملمت أوراقي وشحذت همتي ثم حطيتهم على جنب وأمسكت بلاب توبي وأنا أقول “ما يحتاج قلم وورق ما دام اللاب توب موجود!” ودخلت على موقع Gamezer وقعدت ألعب بلياردو !

ولكن بعد أيام رأيت حطام الذكريات يركض في مواقع الانترنت وهو يصرخ في سجلات الزوار ويستغيث بنا قائلاً: يا ويلي ويلاه الحقوا علي  .. الحقوا على موقعي .. يا ويلي ويلاه الفيروسات .. الفيروسات طبت على موقعي .. يا ويلي ويلاه الفيروسات .. يا ويلي ويلاه موقعي .. موقعي .. موقعي اكلته الفيروسات .. الحقوا علي .. الحقوا علي يا عرب .. الحقوا علي يا مسلمين .. ابك الفيروسات أكلتني .. ابك الفيروسات اكلت موقعي .. ياووووك الحقوا علي يا مسلمين ..

ولكن لم يصدقه أحد للأسف وتوقع الجميع أنه قاعد يهك علينا زي كل مره فلم نعره بالاً حتى أكلت الفيروسات موقعه كله .. وأصيب هو بفيروس الإيدز من شدة انغماسه في الرذيلة  .. وكانت هذه هي نهايته الأليمه ونهاية كل خبل يسويله منتدى ويرسل للناس إيميل سخام يسمي نفسه فيه “عذرية للبيع”!

وتوته توته .. خلصت الحتوته ..

الزبدة

انتهت القصة ولكن لم تنتهي معاناتنا مع المنتديات وكارثة تضخمها الخطيرة الي قاعدين نلاحظها بهالسنوات الأخيرة !

المنتديات صارت كثيرة لدرجة ان كل مستخدم نت عربي اليوم صار وبدون مبالغة يملك تقريباً منتديين ثلاث!! .. والمشكلة طبعاً مهيب في عدد المنتديات ولكن المشكلة صايره في أن كل هالأعداد الغير متناهية من المنتديات العربية ما فيها إلا موضوع واحد قاعد ينتقل كالفيروس من منتدى لآخر ! .. طبعاً إلا ما رحم ربي من المنتديات وهي قليلة جداً ونكاد نحصرها في عملية حصر بسيطة وغير مجهدة !!

وعلى النقيض من ذلك المدونات .. فعلى كثر ما تصادفني مدونات على كثر ما تزيد سعادتي بهالشي بصراحة .. لأن المدونة أصبحت بمثابة زاوية ثابته للكاتب الحقيقي القادر على التعبير والكتابة .. ولا مجال فيها للمنقول إلا للأهمية القصوى جداً وإلا لفقدت المدونة متابعيها بكل بساطة .. ومن وجهة نظري المتواضعة للمدونة فضل في إبراز واجهة مشرفة للنت العربي .. وبالمدونات لم تعد للمنتديات اليوم أي قيمة!! .. فنصيحة أوجهها لكل من يفكر في إنشاء منتدى جديد …

“وفر فلوسك لشي أهم .. فهذا زمن المدونات!”

ما يستفاد

بصراحه هالتدوينة كلها ما كتبتها الا بعد ما لاحظت قابلية استخدام اسم خليك بالشارع في عدد لا بأس به من المنتديات من قبل ناس ما اعرفهم ولا يعرفوني ( <== فاهم قابلية الاستخدام غلط  ) .. وعلشان كذا حبيت أنوه ان عضوياتي الرسمية في المنتديات محصورة بهالمنتديات التالية فقط وغيره تراه تشابه أسماء .. وعليه نحذر من التعامل مع أي خليك بالشارع خارج نطاق هالمنتديات على اساس انه أنا! .. :

- منتديات الاقلاع
- منتديات حارة المساطيل
- منتديات الحاير
- منتديات عرب ووردبريس
- منتديات أحبك موت

وانتظرونا بتدوينه سامجه أخرى الشهر المقبل ان شاء الله ..

. 

خليك بالشارع صاحب التدوينة الأكثر انتشاراً بالعالم ..
“تعلم معي طريقة تخييش المنتديات التي تجبر الزائر للتسجيل لرؤية الروابط في الموضوع” ..
( حتى أنا جتني هالتدوينة على ايميلي 17 مرة من ناس ما يدرون اني خليك بالشارع ) ..
تسوق معه العملية ومن بعد طول انتظار يأتيكم اليوم بتدوينه تعليميه جديده ومهمه هي تدوينة ..
“طقوسي الخاصة في معالجة ألوان الصور الرقمية” ..

. 

هاي شلة .. أذكر اني وعدتكم في التدوينة السابقة الي كتبتها قبل عشر سنين بهذا الوعد

اقوم بتعديل ألوان الصورة بعد ما حفظتها بنمط JPG ببرنامج الفوتوشوب بعد ما انتهي من تعديلها ببرنامج الـ RAW عن طريق استخدام المنحنيات بطريقة تعلمتها واطبقها بحذافيرها من كتاب اسمه “فوتوشوب سي إس – لمحترفي التصوير الرقمي ( ديجيتال )” لمؤلفه “سكوت كيلبي” .. وللمستعجلين صفحة الدرس رقمها 116 بالتحديد .. والكتاب قيمته 105 ريال وموجود في مكتبة جرير .. اما الي ما عندهم مشكلة ينتظرون كم يوم راح اخصص لهالطريقه تدوينة جديدة لأن ما ودي اكثر عليكم بهالتدوينة .. وبعد تعديل الصور بالمنحنيات مثل ما شرحها سكوت كيلبي في كتابه السابق اقوم انا بتبهير العملية من عندي باستخدام فلتر ركبته على الفوتوشوب علشان يعطيني تصحيح نهائي للصورة كخلطة سرية من عندي وهالفلتر راح احطلكم شرح طريقة استخدامه مع التدوينة نفسها الي راح اتكلم فيها عن طريقة سكوت كيلبي في تعديل الألوان باستخدام المنحنيات ان شاء الله بالإضافة للفلتر نفسه راح ارفعه لكم على موقعي وقتها واحطلكم رابط تحميله في نفس التدوينة مع طريقة التركيب بعد .. تامرون امر ..

وطبعاً من منطلق ان وعد الحر دين عليه .. فاليوم هو يوم سداد الدين الي لكم علي ان شاء الله ..

وقبل ما ندرعم على الدرس احب اكرر مره ثانية ان هالدرس منقول بتصرف وباختصار من الكتاب المذكور بالاقتباس الي فوق لمؤلفه المصور الفوتوغرافي “سكوت كيلبي” .. مع اضافة يبطي عظم “سكوت كيلبي” يحطها بكتابه حتى شكله ما يدري عنها اصلاً وهي لمساتي الأخيره والسرية بالفلتر الي راح تتعرفون عليه بآخر درسنا اليوم

قبل وبعد وبعد

الملاحظ للصورة الأولى على أقصى اليمين بلحالها راح يقول ما شاء الله ألوان الصورة روعه وما يبيلها أي تعديل .. بس بعد ما يشوف التعديل بالصورة الوسطانية راح يغير رايه ويقول فعلاً تعديل الألوان كان شي ضروري .. ولكن بالأخير الملاحظ للصورة الثالثه بأقصى اليسار راح يحمد ربه انه يعرف مدونتي لأن تبهيري الاحترافي للصورة خلا تعديل “سكوت كيلبي” يطلع جنب تعديلي كنه شغل حواري مع احترامي الشديد له

ملاحظة مهمة جداً: بعض الصور في هالتدوينة تم تصغيرها علشان نحافظ على الشكل الجمالي للمدونة .. فإذا حسيت ان بعض الصور غير واضحه اضغط عليها وراح تنفتح لك في صفحة جديدة بأبعادها الحقيقية ان شاء الله ..

تعديل مهم قبل البدء بتصحيح الألوان

يقول “سكوت كيلبي” في كتابه اننا قبل ما نصحح ألوان أي صورة فيه تعديلين صغيرين لازم نسويهم على اعدادات الفوتوشوب علشان يصير عندنا في الأخير تصحيح أفضل وأكثر دقه للألوان .. ويقول كذلك انه بالرغم من ان هالتعديلين يُعتبرون تغييرات بسيطه جداً بس تراها في نفس الوقت تعديلات مهمه جداً .. وطبعاً سكوت شرح ليش هالتعديلين مهمين .. بس انا راح اكتفي بشرح طريقة اجراء التعديلات من غير ما اتطرق لذكر الأسباب علشان اختصر عليكم بس ..

## الخطوة الأولى ##

أول شي لازم نغيره في مساحة ألوان الآر جي بي هو هالمساحة الافتراضية المعيّنة في الفوتوشوب ( sRGB IEC61966-2.1 ) لأنه على حد قول سكوت في كتابه تُعتبر هالمساحة أسوأ مساحه لونية بالنسبة للمصورين المحترفين ..

## الخطوة الثانية ##

طريقة تغيير مساحة ألوان آر جي بي ببساطه انك تضغط على المفاتيح Shift+Ctrl+K من كيبوردك علشان ينفتحلك مربع إعدادات الألوان Color Settings .. ومن قسم Working Spaces .. رح لقائمة ألوان RGB المنسدلة واختر Adobe RGB (1998) .. ثم اضغط على OK لاعتماد التعديل الجديد ..

## الخطوة الثالثة ##

نروح الى صندوق العدة ونضغط على القطارة Eyedropper ..

## الخطوة الرابعة ##

بعد ما ضغطت على القطارة رح لشريط الخيارات Options ومن قائمة مقاس العينة Sample Size اختر 3 by 3 Average من القائمة المنسدلة ..

وبعد ما تنتهي من تطبيق هالخطوات الأربع تقدر تعتبر نفسك الحين جاهز للبدء بعمل تصحيح احترافي لألوان صورك .. ولوّنها لوّن على قولة المترجم لكتاب سكوت كيلبي ..

طريقة تصحيح ألوان الصور

منذ ظهور التقنية الرقمية الين اليوم والكاميرات الرقمية عاجزة تماماً عن اعطاء ألوان مثالية لأي صورة نلتقطها مهما كانت جودة الكاميرا .. وعادة تلقى اللون الطاغي بالصورة هو اللون الأحمر وكثير من المرات تطلع الصورة كنها مغسولة بنيلة ( زهرة الغسيل ) يعني كن الوان الصورة مخلوطة بلون ازرق .. وتأكد تماماً ان أي صورة تصورها بأي كاميرا كانت لازم يطلع فيها مسحه لونيه طاغية ومستحيل تعطيك ألوان مثالية تشبه المنظر الحقيقي الي تشوفه وتصوره عدسة عينك الي خلقها الله سبحانه وتعالى وأبدع في صنعها عز وجل .. وإلى اليوم ما شفنا ولا راح نشوف عدسه وحده مصنوعه بيد بشر فيها ربع جودة واتقان عدسة العين .. فاحمد ربك على نعمة النظر ..

ومن هالمنطلق السامي جاءت أهمية تصحيح ألوان الصور وإزالة المسحات اللونية الطاغية من عليها عن طريق برامج الكمبيوتر المختلفة في محاولة منا لإعادة إظهار الألوان بأقرب شكل ممكن للواقع .. فتابعوا معنا الدرس المفيد والمهم جداً لكل مصور فوتوغرافي يهمه ظهور عمله الفوتوغرافي بأفضل جودة ممكنه ..

## الخطوة الأولى ##

نفتح الصورة الي نبي نصحح ألوانها وانا اخترت لكم هالصورة من تصويري المتواضع وهي ما فيها أي حس فني بس راح نستخدمها للتطبيق عليها لا أكثر ولا أقل ( وطبعاً الصورة المعروضة ما راح تحس بأي مشكله في ألوانها للوهلة الأولى والبعض راح يعتقد انها جاهزة للعرض النهائي على المتذوقين .. بس مع التقدم في عملية التصحيح راح تلاحظ انها مثلها مثل معظم الصور .. كانت تحتاج للمعالجة اللونية .. لأن الحقيقة الألوان بالصورة مختلفه تماماً عن الي شافته عيني في الواقع .. والظاهر لي الآن ان الصورة فيها مسحه لونية زرقاء خفيفة طاغيه عليها )

## الخطوة الثانية ##

توجه الى قائمة Image من غير أن تمر بخانة ترافلجار وإلا فلن تحصل على 200 جنيه ( يا ناس اتعبتني خفة دمي ) .. المهم من قائمة Image نذهب الى قائمة Adjustments ونختار Curves .. والكيرفس أو المنحنيات هي الخيار المفضل عند المحترفين لتصحيح الألوان لأنها توفر لك مستوى أعلى من السيطرة مقارنة بالأدوات والطرق الثانية مثل Levels ( الي نستعملها لتصحيح صور الأسود والأبيض ) .. وفي البداية أول ما ينفتح بوجهك مربع المنحنيات راح تقمط منه لأنك راح تحسبه صعب ومعقد ولكن ان بعض الظن اثم .. الطريقة الي راح نتعلمها بهالتدوينة طريقة سهلة جداً وما يبيلها اي خبره سابقه في التعامل مع المنحنيات .. ومن بعد ما تتعلم هالطريقه أصلاً راح تحب المنحنيات كثير  ..

## الخطوة الثالثة ##

قبل كل شي يبيلنا نضبط شوية اعدادات بمربع المنحنيات علشان نحصل على النتايج المطلوبة اثناء عملية التصحيح ..

راح نبدا بضبط اللون الهدف لمناطق الظل عن طريق الضغط مرتين ورا بعض على القطارة السوداء ( الموجودة تحت في يمين مربع المنحنيات .. بالتحديد القطارة الأولى من اليسار ) .. راح يطلع لك بعد كذا منتقي الألوان Color Picker الي راح تشوفه بالخطوة الرابعة من هالتدوينة علشان تحط فيه اللون الهدف للظلال ..

## الخطوة الرابعة ##

راح ندخل القيم التالية في حقول R .. G .. B في مربع Color Picker
في حقل R اكتب 20
في حقل G اكتب 20
في حقل B اكتب 20
ثم اضغط OK لاعتمادها

## الخطوة الخامسة ##

والحين راح نعدل معطيات القطارة حقت جعل مناطق بقع الإضاءة محايدة عن طريق الضغط مرتين ورا بعض على قطارة بقع الإضاءة ( الأولى من اليمين في مربع المنحنيات ) ثم في مربع Color Picker اكتب الأرقام نفس الي بالصورة تحت ..
في حقل R اكتب 240
في حقل G اكتب 240
في حقل B اكتب 240
ثم اضغط OK لاعتمادها

## الخطوة السادسة ##

والحين راح نضبط الدرجات اللونية الوسطى عن طريق الضغط مرتين ورا بعض على قطارة الدرجات الوسطى ( القطارة الوسطانية بين القطارات الثلاث ) واكتب هالأرقام في حقول الآر بي جي :
في حقل R اكتب 128
في حقل G اكتب 128
في حقل B اكتب 128
ثم اضغط OK لاعتمادها

## الخطوة السابعة ##

أوكيك بعد ما حطينا الأرقام الي فوق وبعد ما نضغط على OK في مربع Curves ( لا تضغط OK الحين ) راح يطلع لك مربع تنبيهي يسألك :
Save the new target colors as defaults؟
قله ايه عن طريق الضغط على الخيار Yes
والي سويته بهالحركة انك حفظت الاعدادات الي سويناها قبل شوي علشان ما تقعد تعيدها من جديد كل ما جيت تفتح الفوتوشوب علشان تعدل الوان صورة جديدة ..

## الخطوة الثامنة ##

والحين بعد ما حطينا القيم الي فوق راح نستعمل القطارات الموجودة في مربع Curves علشان نسوي عملية معالجة ألوان الصور .. وراح تتعلم بعد شوي وين تحط القطارة في الصورة علشان تعدل ألوانها عن طريق خدعة بسيطة راح تجبر الفوتوشوب يعلمك وين هالاماكن بالضبط .. لأننا راح نحتاج نحدد المكان شديد الإضاءة بالصورة .. والمكان الشديد الظلمة بالصورة وكذلك مكان الألوان الوسطى ..

## الخطوة التاسعة ##

اذا كان مربع Curves الين الحين مفتوح عندك اضغط على OK علشان تسكره ورح الى لوح Layers واضغط على ايقونة الدائرة نصف البيضاء/نصف السوداء ( الأيقونة الرابعة من اليسار في أسفل اللوح ) واختر Threshold زي الموضح بالصورة ..

## الخطوة العاشرة ##

بعد ما يفتح عندك مربع Threshold اسحب المثلث المنزلق الي تحت الرسم البياني الى أقصى اليسار .. راح يصير لون الصورة أبيض بالكامل .. اسحب المثلث شوي شوي لليمين وبهالأثناء راح تبدا تشوف بعض أجزاء الصورة وهي تظهر أمامك مره ثانية .. وأول منطقة راح تظهر لك هي أغمق جزء بالصورة .. يعني باختصار الفوتوشوب قاعد يوريك أغمق نقطة بالصورة بالضبط .. اضغط OK وراح ينقفل مربع Threshold وراح تنضاف طبقة أو شفيفة خاصة على لوح الطبقات ..

## الخطوة الاحدعش ##

من القائمة المتفرعة اختر قطارة Color Sampling مثل الي بالصورة الي تحت .. رح للصورة الي قاعد تشتغل عليها واضغط على أغمق مكان فيها .. بعد كذا يبيلنا نحدد مكان المنطقة البيضاء بالصورة .. ولتحديد هالمنطقة البيضاء شف الخطوة الاثنعش ..

## الخطوة الاثنعش ##

نفتح مربع Threshold بالطريقة الي شرحناها في الخطوة التاسعة علشان نحدد أماكن بقع الإضاءة في الصورة .. وهالمرة نسحب المثلث الصغير إلى أقصى اليمين .. وبعدين نسحب المثلث شوي شوي جهة اليسار .. وأثناء السحب المنطقة الأولى الي تظهر باللون الأبيض هي الجزء الي طاق النور العالي بالصورة ( الجزء الأشد إضاءة ) .. والحين اضغط OK .. ثم اختر قطارة Color Sampling من صندوق العدة زي ما شرحنالك بالخطوة رقم احدعش واضغط مرة وحده على المنطقة الأشد إضاءة بالصورة لتأشيرها كبقعة بريق ..

## الخطوة الثلثطعش ##

الحين انتهينا من طبقة تعديل Threshold .. وتقدر تحذفها .. وبعد حذفها راح تطلع الصورة طبيعية مرة ثانية بس راح يبقون العلامتين الي حطيناهم ظاهرتين على الصورة .. والحين اضغط على Ctrl+M علشان تفتح مربع Curves.

## الخطوة الأربعطعش ##

أول شي اختر قطارة الظل ( الي نصها أسود ) من مربع Curves .. خذ القطارة معك من مربع Curves الى الصورة واضغط مرة وحده مباشرة على مركز العلامة الأولى #1 بالضبط ( شف الصورة ) .. وطبعاً اذا ضغطت على الهدف #1 راح يتم تصحيح مناطق الظل بالصورة ..

## الخطوة الخمصطعش ##

لا تسكر مربع Curves .. واختر قطارة بقع الاضاءة ( شفها بالصورة الي تحت ) .. خذ القطارة معك للصورة واضغط مره وحده مباشرة على مركز الهدف الثاني #2 بالضبط .. وهالحركة راح تصحح ألوان بقع الإضاءة ..

## الخطوة الصطعش ##

والحين بعد ما صححنا الظلال وبقع الإضاءة .. راح نحتاج لتصحيح الدرجات الوسطى بالصورة عن طريق الضغط على قطارة الدرجات الوسطى ( شف الصورة ) وخذها وحطها على المنطقة الي انت تشوفها رمادية متوسطة أو أسود فاتح بالصورة ..

## الخطوة السبعطعش ##

باقي الحين تعديل واحد مهم لازم نسويه قبل ما نضغط على OK في مربع Curves .. هو اننا نروح لشبكة المنحنيات ونضغط في وسط المنحنى ونسحبه وحنا ضاغطين عليه بالماوس لفوق سحبه صغيره .. هالسحبه شغلتها تخفيف الدرجات اللونية الوسطى في الصورة ( شف الصورة التوضيحية ) .. وعموماً هالتعديل بصري يعني يعتمد في المقام الأول والأخير على ذوقك وعلى نظرتك الفنية للصورة وعلشان كذا مقدار التعديل هنا يرجع لك تماماً .. بس حاول انك ما تكثر منه ولا تمغط المنحنى لفوق مغطه جامده .. يعني حاول تخلي التعديل خفيف وفي نطاق صغير جداً .. وبعدها اضغط OK .

## الخطوة الثمنطعش ##

الحين تقدر تشيل العلامتين من الصورة عن طريق شريط الخيارات الي فوق والنقر على زر الإزالة Clear ( مثل الصورة التوضيحية ) ..

## والحين خذلك بريك وانت تقارن بين الصورة قبل التعديل والصورة بعد التعديل ##

قبل التصحيح اللوني

بعد التصحيح اللوني

الله وش هالابداع اللوني هذا

ولكن التصحيح توه ما انتهى .. باقي خلطتي السرية .. وعلشان تقدر تطبقها يبيلك تحمل الفلتر التالي ..

الفلتر التالي ( هدية المدونة )

اضغط على الصورة الي تحت لتنزيل الفلتر التالي  أو احفظه عن طريق حفظ الهدف باسم – Save target as

بعد حفظ الفلتر التالي في جهازك افتح الملف المضغوط واضغط على الملف الي بوسطه واختر Run أو تشغيل وسيتم تركيب الفلتر التالي تلقائياً ببرنامج الفوتوشوب .. بس اذا كان فوتوشوبك وقتها مفتوح يمكن ما راح تشوف الفلتر التالي مع قائمة الفلاتر عندك الا بعد تسكير واعادة تشغيل برنامج الفوتوشوب من جديد ..

الخلطة السرية الفلترية الخليك بالشارعية

والحين جينا للجد عاد .. والله الله عالقد والقد الله الله عليه ..

## الخطوة الأولى ##

أول شي يبيلنا ندمج طبقة التعديلات السابقة الي سويناها على ألوان الصورة ( الموضحة بالصورة التوضيحية الي تحت ) مع الصورة الي اشتغلنا عليها عن طريق الضغط على Ctrl+E من لوحة المفاتيح أو الكيبورد .. ( ركزوا معي يا رعاكم الله مهوب نحذف الطبقة .. ندمجها بس .. لأننا راح نكمل على الإعدادات الي سويناها بطريقة سكوت كيلبي )

## الخطوة الثانية ##

من قائمة Filter اختر الفلتر التالي الي أهديتكم اياه تو ( ذليتكم بهالفلتر التالي الظاهر ) .. وللمعلومية ترى الفلتر التالي اسمه العلمي DCE Tools وهذا الي راح تقراه في قائمة الفلاتر عندك .. ومن القائمة المنسدلة اختر ColorCast Correction ..

## الخطوة الثانية ##

في مربع ColorCast FIX اختر العمل في جزء Color Cast وقم بالتأشير على Auto Levels وكذلك على Flash Used حتى إذا كنت ما استخدمت الفلاش في التقاط الصورة حط صح جنب Flash Used ( هذا الي انا أسويه بالضبط ) .. والحين حرك المؤشر لليمين أو لليسار وراقب التغييرات الي راح تظهر على الصورة وشغلتك انت توقف المؤشر متى ما حسيت ان شكل الصورة صار حلو يعني هالعملية راح تتحكم فيها نظرتك الفنية للصورة ( انت وذوقك ) ..

## الخطوة الثالثة والأخيرة ##

إذا كانت الصورة الي صححت ألوانها بورتريه ( صورة شخصية / صورة وجه ) أجل لا تنسى تطبق هالمعالجة المشروحة في هالتدوينة بعد ما تنتهي من تصحيح ألوانها ..

http://www.mamdou7.com/?p=172

وطبعاً ما يحتاج اذكركم بتطبيق هالخطوة الأخيرة والمهمة على كل صوركم والي شرحتها لكم في تدوينة سابقة بعد وهي خطوة زيادة توضيح الصور .. طبق المشروح بهالتدوينة وادعيلي ..

http://www.mamdou7.com/?p=93

وأخيراً نتيجة شغلنا

الصورة بعد تصحيح ألوانها بطريقة سكوت كيلبي وبعد استخدام الفلتر ..
رأي النقاد والصحفيين عليها: الله وش الفن هذا

الصورة بعد تصحيح ألوانها بطريقة سكوت كيلبي ..
رأي النقاد والصحفيين: يعني .. الألوان مش حالك

الصورة بعد التقاطها بالكاميرا الرقمية مباشرة من غير أي تعديل ..
رأي النقاد والصحفيين: ويع وش هالقرف!! .. شكلها مقرف

وبكذا يكون انتهى الدرس واتمنى ان الشرح كان واضح

وبغض النظر عن الاسم أو النطق الصحيح لهالنوع المهم جداً من التصوير لازم نعرف ان مقياس كونك مصور فاهم من عدمه في نظر الشخص الي انت قاعد تصوره هو انه على سبيل المثال يكون شكله يشبه سعد جمعه بالواقع بس بالصورة المفروض يطلع شكله كنه جورج كلوني!

وتحليلي المتواضع لهالظاهرة انه الانسان عادة يبني عن نفسه صورة خيالية وهمية في خياله ويحسب نفسه يشبها بالواقع .. وما نبي نظلم كل الناس بصراحه لأنه قد تكون هالصورة الخياليه أسوأ من الواقع عند اشخاص متواضعين مثلي والي يصير اذا شافوا صورهم “قالوا اثرني حلو والله ” .. وقد تكون هالصورة الخيالية مطابقة للواقع فينطبق على اصحاب هالتخيل قول “رحم الله امرئ عرف قدر نفسه” وبرضوا مثلي .. ولكن مشكلتك كمصور فوتوغرافي محترف مثلي ان تكون هالصورة الخيالية الوهمية عن النفس للي قاعد تصوره أحلى بكثير من الواقع وأصحاب هالتخيلات تنطبق عليهم مقولة “لا يكثر” وهم ماهم مثلي طبعاً الله يرفع عنهم ولا يبلانا لأن هذا غرور يا إخوان وأخذ مقلب بالنفس ..

<=== ابد صاير كنه من هذول الي يجاوبون على اسئلة “جاوب على الأسئلة التالية واعرف شخصيتك الحقيقية” بالفيس بوك ثم يقعد يختار أقوى الإجابات وهي مهيب تنطبق عليه بس هو يتمنى انه كذا! ويجيك بالأخير يحسب النتيجه وتطلع النتيجة “شخصيتك الحقيقية هي ابو شهاب في باب الحارة الجزء الثالث” .. ثم يقوم الأخ وبكل وسع وجه يضغط على شارك النتيجة مع اصدقائي .. عسى ما شر يابو الشباب! .. هنود عندك ولا متعرف علينا بشات وقاعد تهك علينا! ..

والأمثلة على ذلك تطول .. والفيس بوك مجال خصب والوقت بدا يداهمنا وعلشان كذا خلونا ندخل في صُلب الموضوع ..

فالبعض يعتقد ان الجمال بات حكراً على طبقة معينة من الشعب .. ولكن كبار الفوتوغرافيين لهم رأي آخر! .. فهم يقولون “لا يبن الحلال الجمال ما عادهوب حكر على طبقة معينة من الشعب .. لأنه مادام فيه مدونة خليك بالشارع ويحط فيها طقوسه الخاصه في معالجة البورتريهات بالفوتوشوب وببلاش بعد فلقد اصبح الجمال في متناول الجميع وعلى مختلف تنوع أطياف الشعب” .. ( أما ببلاش! .. هذول طلعوا سلنتح ماهم كبار فوتوغرافيين! )

وهنا أحب أن أضيف معلومه مهمه وهي ان الجمال الحقيقي في الواقع ليس جمال الشكل .. انما الجمال الحقيقي جمال الردهان ( <=== ليتك تبدا الدرس وتفكنا من قفشاتك الساخرة يا عادل امام الثمانينات )

وعليه راح اعلمكم اليوم وشلون نعالج البورتريهات بالفوتوشوب وذلك تلبية لرغبة كبار الفوتوغرافيين مثل ما قريتوا فوق ..

وطبعاً قبل ما أبدا في شرح طقوسي الخاصه في معالجة البورتريهات احب ان أشير بقلم ليزر الى اربع شغلات مهمات ..

- الشغلة الأولى -

الفايدة الي راح تخرجون فيها من هالتدوينة اليوم وعلى بلاطة هي طريقة تنعيم الوجه وكذلك طريقة اضافة لمعة زجاجية على العين مع تصحيح السقطات الضوئيه في الصورة وطريقة تعزيز الضلال .. وهالشي انا اعتبره تصحيح موب تغيير مثل ما يعتبره البعض ويصنفه تحت بند الغش والتدليس في التصوير .. فمن رايي ان الكاميرا من صنع الانسان ومستحيل ان تضاهي صنع الخالق سبحانه وتعالى للعين بأي شكل من الأشكال فمستحيل ان تعكس الكاميرا الصورة تماماً كما تراها العين من غير تدخل الفوتوشوب للتصحيح وليس للتغيير طبعاً وهذا هو استخدامنا كفوتوغرافيين للفوتوشوب .. إذن المعالجة ضرورية جداً ومن التقصير بحق جمال الصورة إهمال معالجتها بصراحه .. والكاميرا تبرز أشياء في الصورة ما تكون واضحه للعين المجردة مثل أدق المسام والتعرجات في أي شي نصوره ويكون بحاجة للتنعيم لإخفاء هالأشياء الي ما نلاحظها عادة بالعين المجردة ..

أما - الشغلة الثانية -

فهي انه لكل مصور فوتوغرافي طريقته وطقوسه الخاصة في معالجة بورتريهاته ولذلك سميت هالطريقة بطقوسي الخاصه .. وما توصلت لطريقة هالمعالجة الا بعد عشرات التجارب والمحاولات والتعلم عن بعد ( التعلم عن بعد: اوقف فوق راس الي يعالجون الصور بالفوتوشوب باستوديوهات التصوير واتعلم منهم ما يسهل حمله ويغلو ثمنه ) .. وبالنسبة لي هالخلطة السرية ناسبتني كثير واعتبرها الأدق نتائج والأكثر احترافيه .. فـ من منظور لا خير في كاتم العلم ومن منظور ان زكاة العلم تعليمه .. عليكم بالعافية الخلطة السرية لطقوسي الخاصة في معالجة البورتريهات ..

و - الشغلة الثالثة -

هي اني اقوم بالتقاط الصور بالنمط الخام RAW .. وبعدها افتح صور الـ RAW ببرنامج جا ببلاش على سي دي مع الكاميرا حقتي اسمه Digital Photo Professional ومن خلاله اقوم بتعديل تعريض الصور والتشبع اللوني لكل صورة وتوازن اللون الأبيض ومن هالسوالف وبعدين احفظها بنمط الـ JPG تمهيد لمعالجتها بالفوتوشوب .. والتعديل الي اسويه بالبرنامج السابق سهل جداً وماله اعدادات معينه ثابته وما يبيلها درس لأنها تعتمد بالأول والأخير على ذوقك وعلى الصورة وعلى اعداداتك المسبقة للكاميرا .. ولو بتكلم عنه الحين راح نتشعب تشعب مهوب صاحي ولا راح نخلص منه .. باختصار نمط الـ RAW يعطيك القدرة والمرونة على انك تعدل الصورة بطريقه شاملة لدرجة انه يمديك تعدل على أشياء تسبب فيها إعدادك الخاطئ للكاميرا أثناء التصوير .. فأنصحكم بالتقاط كل صوركم الفوتوغرافية باستخدام هالنمط وهو متوفر في جميع الكاميرات الاحترافية الديجيتال على حسب اعتقادي أما الكاميرات الشبه احترافيه فالعلم عند الله اذا فيها او ما فيها مدري بصراحه .. أما كاميرات بوينت آند شووت وكاميرات الجوال فـ متأكد انه ما فيها ..

وأخيراً - الشغلة الرابعة -

هي اني اقوم بتعديل ألوان الصورة بعد ما حفظتها بنمط JPG ببرنامج الفوتوشوب بعد ما انتهي من تعديلها ببرنامج الـ RAW عن طريق استخدام المنحنيات بطريقة تعلمتها واطبقها بحذافيرها من كتاب اسمه “فوتوشوب سي إس – لمحترفي التصوير الرقمي ( ديجيتال )” لمؤلفه “سكوت كيلبي” .. وللمستعجلين صفحة الدرس رقمها 116 بالتحديد .. والكتاب قيمته 105 ريال وموجود في مكتبة جرير .. اما الي ما عندهم مشكلة ينتظرون كم يوم راح اخصص لهالطريقه تدوينة جديدة لأن ما ودي اكثر عليكم بهالتدوينة .. وبعد تعديل الصور بالمنحنيات مثل ما شرحها سكوت كيلبي في كتابه السابق اقوم انا بتبهير العملية من عندي باستخدام فلتر ركبته على الفوتوشوب علشان يعطيني تصحيح نهائي للصورة كخلطة سرية من عندي وهالفلتر راح احطلكم شرح طريقة استخدامه مع التدوينة نفسها الي راح اتكلم فيها عن طريقة سكوت كيلبي في تعديل الألوان باستخدام المنحنيات ان شاء الله بالإضافة للفلتر نفسه راح ارفعه لكم على موقعي وقتها واحطلكم رابط تحميله في نفس التدوينة مع طريقة التركيب بعد .. تامرون امر ..

والحين جينا للزبدة عاد .. فـ خلكم جاهزين ومصحصحين معي .. ويا حبذا لو تفتحون فوتوشوباتكم الحين وتطبقون معي خطوة بخطوة علشان يصير الدرس اسهل للفهم واوضح ..

وعلشان ما تحسون بملل وانتم تشتغلون تقدرون تشغلون هالأغنية وتستمتعون فيها اثناء العمل واذا ما ودكم مهوب لازم ترى ..

## االطقوس ##

مثل ما قلت لكم بعد ما أعدل الوان الصورة بالطريقة الي ذكرتها لكم بالشغلة الرابعة فوق والي راح اشرحها لكم بالتفصيل الممل في تدوينه جايه بالطريق ان شاء الله .. راح ابدا بتجهيز نفسي لتنعيم البشرة وانا اخترت لكم على سبيل المثال لا الحصر صورة الرئيس الأمريكي الحالي باراك أوباما علشان نطبق عليها ..

( هالصورة مصغره لأن حجمها كبير .. اضغط على الصورة علشان تشوفها بحجمها الحقيقي )

نضاعف الصورة مرتين عن طريق الضغط على مفتاحي Ctrl + J مع بعض مرتين .. وراح تصير عندك 3 طبقات من نفس الصورة .. الطبقة الي تحت راح يكون اسمها Background والطبقة الوسطية راح يكون اسمها Layer 1 أو Background copy .. والطبقة الي فوق راح يكون اسمها Layer 1 copy أو Background copy 2 ( اختلاف الاسم يعتمد على الطريقة الي استخدمتها علشان تضاعف الطبقة لأن فيه اكثر من طريقه ولكن مهوب هذا موضوعنا اليوم ) ..

شغلنا راح يكون على الطبقة الي فوق ( Layer 1 copy أو Background copy 2 ) علشان كذا تأكد انها هي الطبقة الي محدد عليها باللون الأزرق ..

نروح لقائمة Filter > ونختار Blur > ثم نضغط على Gaussian Blur
والقيمة نحطها 9.4 مثل ماهو موضح بالصورة ..

وعلى نفس الطبقة الي طبقنا عليها الفلتر السابق ( Layer 1 copy أو Background copy 2 )
نروح لقائمة Filter > ونختار الفلتر Noise > ثم نضغط على Add Noise
والقيمة نخليها 3 .. زي الصورة الي تحت ..

( هالصورة مصغره لأن حجمها كبير .. اضغط على الصورة علشان تشوفها بحجمها الحقيقي )

والآن وحنا محددين على نفس الطبقة الي طبقنا عليها الفلترين السابقين
نروح لقائمة Layer > ثم نختار Layer Mask > وأخيراً نضغط على Hide All
واذا شغلك صح بتكون النتيجة عندك زي الصورة الي تحت ..

والحين نختار فرشة ذات لون ابيض ناصع وبحدود ناعمه وبحجم مناسب وتأكد ان قيمة الـ Opacity محطوطة على 25%
انظر الصورة الي تحت ..

( هالصورة مصغره لأن حجمها كبير .. اضغط على الصورة علشان تشوفها بحجمها الحقيقي )

نبدأ بالضرب بالفرشاة على الطبقة الي فوق ( Layer 1 copy أو Background copy 2 )
والضرب يكون على الوجه فقط متجنبين العيون والشعر والفم والخشم وحدود الوجه والملابس لأن هالأشياء من المهم جداً انها تكون حادة وغير ناعمة
يعني الضرب يكون على الخدين والجبهة والذقن للتنعيم ( باختصار الضرب يكون على بشرة الوجه الخالية من الشعر فقط )

وقبل الانتقال للمرحلة الجاية ابخليكم تقارنون نتيجة التنعيم علشان تشوفون الفرق وتحسون بنوع من الراحه النفسيه ..

( هالصورة مصغره لأن حجمها كبير .. اضغط على الصورة علشان تشوفها بحجمها الحقيقي )

بعد ما انتهينا من مرحلة التنعيم راح ندمج الطبقة الي فوق ( Layer 1 copy أو Background copy 2 ) مع الطبقة الي تحتها مباشرة ( Layer 1 أو Background copy )
عن طريق الضغط على مفتاحي Ctrl + E بكيبوردك مع بعض ..

ثم ننشئ طبقة جديدة فاضية عن طريق الضغط على الأيقونة الي عليها دويرة حمرا بالصورة الي تحت ..

نغير مود الطبقة الجديدة الفاضية من Normal الى Soft Light ..

ثم نمسك عين اوباما ويستحسن تكبير الصورة عن طريق الـ Navigator الى على اليسار علشان يصير الشغل اسهل ..

نختار فرشة بيضاء ناصعة ذات حدود ناعمة وبحجم مناسب وتأكد ان قيمة الـ Opacity محطوطة على 25% .. ثم ابدأ بالمرور بالفرشاة بشكل دائري على الجزء الملون من عدسة العين مرة أو مرتين أو ثلاث .. هالشي يعتمد على ذوقك وعلى الصورة .. والنتيجة هي لمعة زجاجية حلوة على العين ..

( هالصورة مصغره لأن حجمها كبير .. اضغط على الصورة علشان تشوفها بحجمها الحقيقي )

والآن نختار فرشة ذات مقاس أصغر وحدود ناعمة ونختار اللون الأسود الداكن ونحدد على اطراف عدسة العين ..

والحين لتعديل السقطات الضوئية على الوجه تأكد من تخفيض قيمة الـ Opacity من 25% الى 20% ثم اختر فرشاة ذات حدود ناعمة وبحجم مناسب واختر اللون الأبيض الناصع وامسح بالفرشاة على الأجزاء التي ترغب في تفتيحها ضوئياً من الوجه ..

( هالصورة مصغره لأن حجمها كبير .. اضغط على الصورة علشان تشوفها بحجمها الحقيقي )

ونفس الطريقة الي فوق اتبعها لتعزيز الظلال على الوجه ولكن اللون غيره الى الأسود الداكن ..

وطبعاً باقي الحين خطوة أخيرة ومهمة جداً شرحتها لكم في تدوينة سابقة وهي خطوة زيادة توضيح الصورة ..
طبق المشروح بهالتدوينة ..

http://www.mamdou7.com/?p=93

وهذي هي النتيجة النهائية لعملنا ..

( هالصورة مصغره لأن حجمها كبير .. اضغط على الصورة علشان تشوفها بحجمها الحقيقي )

وهذي الصورة الأصل للمقارنة ..

( هالصورة مصغره لأن حجمها كبير .. اضغط على الصورة علشان تشوفها بحجمها الحقيقي )

وبكذا يكون انتهى الدرس وأي استفسار انا حاضر

قبل لا ابدا احب اعتذر من كل شخص أرسل لي رسالة عن طريق فورم راسلني الي كنت حاطه بالمدونة وحس اني زلبته .. في الحقيقة انا ما زلبت اي احد راسلني عن طريق هالفورم المخيس ولكن الحقيقة ان الفورم ما كان يوصلي رسايلكم من الأساس! ..

الي صار اني قعدت فترة طويلة وما جتني رسايل عن طريق هالفورم .. فـ قلت معقولة لهالدرجة انا انسان منبوذ ولا احد يبي يرسلي شي ! .. فجيت ابرسل لنفسي عن طريق هالفورم رسالة تجربة وهالكلام من اسبوع وشوي والين اليوم ما زلت انتظر هالرسالة .. طبعاً شلت الفورم الله يفشله منعاً للإحراج واحب اقولكم ترى كلكم محل احترام وتقدير ورسايلكم كلها على العين والراس!

ولكن فيه رسايل جتني وما رديت عليها وانا بكامل قواي العقلية متعمد مع الاعتذار لاصحابها!

يعني مثلاً يجيني واحد ما يعرفني ولا اعرفه ( وهالشي مهوب عيب طبعاً ) واكيد ما قرا ولا كلمة في المدونة ولا همته المدونة ولا محتوياتها أصلاً لدرجة ان اسمي ممدوح وموقعي دومينه مكتوب بالبنط العريض ممدوح دوت كوم ويقولي “محمد ابيك تصمملي مدونة ولو بمقابل مادي” أو “صديق ابي ستايل مدونتك ابركبه على مدونتي” ..

وين يا عمي!!! .. طيب صر صديقي بالاول وبعدين قلي عطني ستايل مدونتك ..

على العموم تصميم هالمدونة مع الهيدر طلعوا معي بالصدفة البحته وبعد عشرات المحاولات والتجارب المضنية .. واخوكم من جنبها بالتصميم وذوقي خايس جداً في تركيب الألوان على بعض .. ولا كان ما قصرت مع احد منكم وببلاش وربي .. وثالث شي وهو الأهم ترى بايخه جداً وشي يبعث الى الملل بصراحه انه تصير المواقع كلها استنساخ من بعضها البعض .. وشي حلو ان يكون لكل موقع طابعه الخاص ولمسات راعيه الابداعيه من الألف الى الياء واذا ما كان عندنا افكار نقدمها أو اي جديد نخدم فيه مستخدم النت العربي أجل ليه نسوي مواقع من الأساس؟!
( <=== مدري عنك يا راعي موقع فيس بوك الغفلة )

مع كامل ودي واحترامي لكم جميع .. ولا تبعدون عن المدونة تراني مجهزلكم تدوينات منوعه راح تشوف النور ان شاء الله قريب .. بعضها مفيد واكثرها كلام فاضي ( مثل هالتدوينة الغبية ) بس علشان ما تحسون اني مقل في الكتابة وكذا

استودعكم الله الذي لا تضيع ودائعه

أدري صمتوا صمتوا ثم افطرتوا على بصلة على هالتدوينة الي مدري وشلون قايلة!

بس قلت عيب يجي العيد وما نعايد عليكم ..

كل عام وانتم بخير ونعتذر على هالانقطاع الفترة الي راحت وابشروا بكل جديد وشيّق من السوالف والخرابيط بعد العيد ان شاء الله

قال الحكماء قديماً / لكل منتدى حكاية .. ولكل حكاية نهاية .. ولكن تبقى الذكريات ممزوجة بنهايات البداية ( وجه حكيم متوهق بالسجع ) .. فماهي حكايتنا!

بدأت الحكاية في أواخر سنة 1999م مع دخول خدمة الانترنت الى بلادنا الغالية .. بعد ذلك بشهور قليلة كانت المنتديات العربية تنعد على الأصابع .. ومن أبرز المنتديات الي عرفتها انا شخصياً في ذاك الوقت كانت منتديات الإقلاع وطبعاً كنت عضو مشارك في المنتدى لأنه انحلف علي اني أشارك بالإقلاع بصراحه وقالوا لي تكفى يا خليك بالشارع يا خفيف الدم تكفى سجل معنا بالاقلاع وصر عضو معنا علشان ينشهر منتدانا ونصير نقهر المنتديات الثانية علشانك سجلت عندنا ولا سجلت عندهم والي خدم الاقلاع في ذاك الوقت وخلاني أتنازل واسجل معهم اني كنت شخص أحب البساطه بطبعي تماماً كبساطة تدوينتي هذه وصاحب شخصية مرحة تكره التقييد والجمود ( <== بشويش عليهم يا عادل إمام ) وهذي كانت البيئة الي وفرتها لنا الاقلاع كفكرة غير مسبوقة على مستوى المواقع والمنتديات العربية بذاك الوقت فسجلت معهم وصرت عضو من أعضائهم .. وكذلك اذكر كانت فيه منتديات أبو نواف بالإضافة لقروبهم البريدي المشهور بس ما سجلت معهم لأن كانت عندي قناعة داخلية تقولي ان الاقلاع يكفي .. فكنت بالنسبة لهم مجرد قارئ لا أكثر ولا أقل وكان منتداهم بنفس قوة منتديات الاقلاع ولكن بنكهة ثانية وحلو التنويع .. واذكر كذلك من المواقع الي كنت كثير التردد عليها موقع بناتين أول موقع عربي على النت موجه للفتاة العربية .. هذي تقريباً كانت ابرز المواقع الي كنت دايم التردد عليها .. وهذا كان العصر الجميل للانترنت العربي .. سقى الله هـاك الايام

الله يذكر أيام نادي بناتين بالخير
قال ايش .. قال Dont’t click here

ولكن في سنة من السنين قدّر الله على عدد مهوب بسيط من أفضل كُتّاب الإقلاع وصارت عليهم مشكلة ما خضت بحيثياتها بصراحه وولا ودي أخوض فيها .. بس هالمشكلة كانت نتيجتها ان ادارة الاقلاع أوقفت عضوية كل هالنخبة من الأعضاء إيقاف نهائي .. ونتيجة لهالإيقاف ظهرت على الشبكة العنكبوتية منتديات حارة المساطيل وكذلك منتديات الحاير .. ومجموعة توجهت للمساطيل ومجموعة توجهت للحاير وانا قعدت بالإقلاع ( <=== وش عنده النخبة ) .. وكنت كل ما كتبت موضوع جديد أحطه بالاقلاع وبالمساطيل وبالحاير .. لأن بالمساطيل كانوا فيه كُتّاب أحبهم وتعلمت منهم .. وكذلك بالحاير .. باختصار الحاير والمساطيل كانوا مجرد فرعين للإقلاع بنظري .. بس الحين صار لكل منتدى كيانه المستقل طبعاً وعلينا احترام ذلك ..

بعد فترة قرر ابو نواف انه يسكر المنتدى ( مجالس ابو نواف ) وقالوا انهم راح يكتفون بالقروب .. وكانت نتيجة لهالقرار ان نخبة من أعضاء مجالس أبو نواف توجهوا الى منتديات الحاير وانتشر البعض الآخر في منتديات ثانية كلن وميوله طبعاً مع استمرار مشاركتهم بالقروب البريدي المعروف قروب ابو نواف ..

لقطة أرشيفية من موقع أبو نواف مسوين فيه استفتاء علشان يسوون منتدى

وهذي بعد لقطة أرشيفية لمنتديات ( مجالس ) أبو نواف

ولكن في أصيل ليلة باردة مظلمة من ليالي شباط نجح مجموعة من طلاب الثالث متوسط على كم طالب من طلاب الأول ثانوي باختبارات آخر السنة وعندما سألهم آبائهم عن هدية النجاح التي يريدونها كانت الطامة الكبرى! .. فلقد طلب كل هؤلاء الطلاب ان يكون لكل واحد منهم منتدى .. وهاتك يا ملحجه عاد .. صرنا نشوف منتديات تصاميمها وردية على صور ورود وعصافير ووحده قاعده تغمز بعيونها على طرف الهيدر والثانية تبربشلي .. ولا أسامي المنتديات هذي بلحالها موضوع ثاني .. منتديات الشوق جابك .. منتديات الشوق جابني .. منتديات الشوق الجريح .. منتديات الحزين ابو عيون عسلية .. منتديات خذاني الشوق .. منتديات أرجوك خذي الرقم .. منتديات تراني مت ( <=== يقالك يبي يفجع المعجبات عليه .. ارحمهم يا راشد الماجد ) ..

لا وفينا طبع شين بعد .. اذا شفنا واحد سواله منتدى يهتم بالتصوير الفوتوغرافي مثلاً ونجح منتداه لأنه بادر وجاب فكرة محد سبقه عليها وصار منتداه الملاذ الوحيد للمصورين الفوتوغرافيين .. جاك واحد ثاني ومن غير اي سبب وجيه وسواله منتدى ثاني يهتم بالتصوير الفوتوغرافي! وعلى سيرفر جنبه .. طيب ليه ما تسجل مع المنتدى الأول وانتهى الموضوع! ولا ما تتنازل تكتب الا في منتدى مسويه بفلوسك يا ولد الراجحي؟! .. فينا طبع الغيرة والحسد ما نبطله للأسف .. وكن المنتديات صارت موضه هالايام .. كل من جا وسلم عليك بالشارع قالك حياك الله تفضل هذا المنتدى حقي سجل فيه لو سمحت! .. والبعض يقول وش معنى فلان عنده منتدى وانا لأ! .. فصار هذا الدافع للواحد انه يسوي منتدى للأسف/ “وش زود فلان عني عنده منتدى وانا لأ!”

والا المنتديات الساخره يعني الحين ما يكفون الاقلاع وحارة المساطيل والحاير وكرفته ( اجحدها يابو مخ ما فيه عاد ) ومدري اذا فيه منتدى ساخر قوي غيرهم .. علشان نشوف لنا منتديات ساخرة لم ولن تقدم اي جديد للساحه الساخره على النت ومن كثرها صاروا ما عاد يدرون وش يسمونها فصرنا نشوف اسماء منتديات ساخره مثل منتديات الخبول – منتديات عيال الكلب – منتديات كل تبن – منتديات ملاعين الجدف – منتديات المجانين – منتديات العرابجه – منتديات ابوي شرطي وعنده مسدس!
وكأن خفة الدم صارت بالكلام القذر .. ترى خفة الدم والسخرية مهيب بالكلام القذر والألفاظ النابية .. وترى سالفة ان الكاتب الساخر انسان عربجي وطول يومه قاعد يفحط بالشوارع غير منطقية ابداً .. ولا وشلون هالعربجي يلاقي وقت كافي يكتب فيه مواضيع ساخره وهو طول يومه قاعد يفحط بالشوارع!

وصحيح انه يؤخذ علي اثناء كتابتي لقصصي استخدام الكثير من الألفاظ النابية ولقد تم لفت نظري لهالموضوع في أكثر من مناسبه ولكن انا اُعتبر حاله خاصه يا إخوان ومن الظلم مقارنتي بأصحاب المنتديات الي فوق .. فلقد عشت وترعرعت في طفولتي ومراهقتي حياة صعبة ومريرة بين رجال العصابات في حواري لوس انجلوس الضيقه ( <== ما تعوق معه )

صرنا اليوم نذرع النت جيئة وذهاباً غارقين في خضم متلاطم من المنتديات كثيرها الغث وقليلها السمين .. وجيت انا وكملت الناقص بجسد اللقافة .. لا والي يثبتلكم ان ما عندي سالفة ان منتديات جسد اللقافة دخلت موسوعة جينيس للأرقام القياسية عن كونها أول منتدى بالعالم يتغير اسمه عشرين الف مرة وخلال سنتين ثنتين فقط!

وصحيح المنتدى حقق قاعده جماهيرية أسعدتني نوع ما لأن هالقاعده الجماهيرية جت في وقت صعب يبرز فيه اي منتدى على النت ولكن الحقيقة اننا بدينا متأخرين كثير .. وولا قدرنا بصراحه ولا راح نقدر نضيف شي جديد للنت العربي! .. والواقع يقول “يا كثر المنتديات” ..

بالله شوفوا معي ليه مسجله الأخت عائشة في هذا المنتدى ( الله من زين الدافع ومن زين المنتدى! ) إلى هالدرجة وصلت بنا السطحية!

سجلت في المنتدى علشان شكله يا إخوان! .. وأضم صوتي لصوتها طبعاً ولكن فقط عندما قالت “ياااااااااا كثر المنتديات”

ولتلطيف الجو ابيكم تشوفون هالإداري كان يبي يكسر بخاطر أعضائه علشان يستحثهم للمزيد من المشاركه فقام حط موضوع يسأل أعضاءه فيه هالسؤال “وش تبي تكون ردة فعلكم اذا دخلتوا يوم المنتدى وقريتوا هالجملة ( عذراُ تم إغلاق المنتدى للأبد )” شوفوا وش كان اول رد عليه

وهو صادق “يا كثر المنتديات” يعني لو الاقلاع الي بيسكرون المنتدى صح بتكون صدمة لكن منتدى تصميمه تصميم افتراضي يجي ببلاش مع نسخة الفي بوليتن اذا شريت من عندهم الترخيص وقاعد يتغلى بعد! من جد “يا شيخ رح انقلع بيتكم” على قولة حبيب الحبيب في برنامج “أم الحالة”

الأمثلة كثيره طبعاً بس راح يكون البرنت السكربن الجاي آخر مثال على سالفة يا كثر المنتديات .. البرنت سكرين الجاي عبارة عن رد على موضوع للنقاش كتبته عضوه تتكلم فيه عن المنتديات أم واسطه .. والمنتديات أم واسطه هي منتديات تكتب فيها أسماء إعلامية او أدبية أو ثقافية معروفة .. وولا يتنازلون يكتبون بين الطبقة الكادحه من الكُتاب المغمورين .. افتتحت العضوة موضوعها النقاشي بسؤال الأعضاء بالمنتدى عن اذا كان فيه أحد عنده واسطة علشان تسجل ويقبلون عضويتها بالمنتدى الفلاني؟! .. لأنها تشوف نفسها عندها الموهبة والثقة لمجاراة هالأسماء المعروفة فليش يحرمها راعي المنتدى من التسجيل والمشاركة؟! .. شوفوا الرد الصاحي على موضوعها ..

وفعلاً يا كثر المنتديات!

ولذلك وتحت شعار “لا يكثر” بادرت بنفسي أولاً فأغلقت جسد اللقافة .. وصدقوني ما سكرته الا بعد استخاره وأكيد الخيرة كانت في تسكيره .. ومع ذلك ما أبي أنسى أيام حلوة مرت علينا بالمنتدى ولا أروع أعضاء عرفتهم فيه ..
ولكن الأهم من ذا كله اتمنى انكم عرفتوا الحين ليه سكرت المنتدى
كونوا بخير جميعاً واخليكم مع هالصور لنا وللتاريخ!

ما انسى قط وجوه رحمه الله تعالى فجعنا جميعاً بخبر وفاته بحادث انقلاب رحمه الله تعالى وأسكنه فسيح جناته .. ادعوله يا إخوان فهو في أمس الحاجه لدعائنا اليوم

وما انسى EHTMAMATE محمد الفيصل .. اسم مميز وعضو مميز نشر أجواء مرحه بالمنتدى خلال فترة تواجده معنا .. عضو مبدع وصاحب أفكار ابداعية رائعة .. أعتقد انه اليوم صاحب منتديات التخصصي ..

جانب من أعماله التي يعبّر من خلالها عن حبه لجسد اللقافة ..

رسم شعار جسد اللقافة على جدار سطح بيتهم وصوره لنا

طور شعار جسد اللقافة ولبسه شماغ وهذا تطبيقي بالفوتوشوب لفكرته تحت ..

ننتقل بكم الآن إلى شخصية قيادية ومقلعة في نفس الوقت اعتمدت عليه كثير في ادارة جسد اللقافة وأعطى أكثر مما توقعت منه وأي نجاح حققه جسد اللقافة اعتقد ان الفضل يرجع بعد الله له .. اهاا بس اهاا ..

هاهو اهاا بس اهاا قاعد يدخن السيجار الكوبي

ولازم نذكر الحاضر الغايب غير الناس .. هالعضو مضرب المثل في الوفاء والإخلاص وما خلا منتدى بالنت ما أبثره بموضوع يعبر فيه عن حبه لـ جسد اللقافة

وشكر خاص جداً لـ قرنـ!سة، مزعلة النسـا، جعطوط، بلقيس، Signature !، Rayan M، هسترة أو مخ مافيه!، ميمو Memo وكل من شارك في سبيل نجاح المنتدى وترسيخ اسمه على الشبكة العربية .. شكراً لكم من القلب ووداعاً جسد اللقافة ®

:: سجل يا تاريخ .. واشهد يا زمن ::

تاريخ اغلاق أبواب جسدنا 22-10-2009م | يوم الخميس

كثير من المنتديات شوي وتحب رجلك عشان تسجل عندهم

ومن اكثر ما يدبل كبد الزائر انه يكون مستعجل ومشغول وقاعد يدورله على رابط لبرنامج معين او اي ملف معين هو يبيه عن طريق محرك البحث قوقل .. واخيراً يلقى الرابط الي كان يدور عليه ولكن في مجموعة من المنتديات .. وكل ما يدخل على منتدى يلقى مكتوب ( عفواً لقد تم حجب هذا الرابط عن الزوار .. يجب عليك التسجيل عشان تشوفه ) وبعض المنتديات الأخرى تتمادى في البثارة الى درجة انها تقولك ( يجب عليك التسجيل والرد بعد عشان تشوف الرابط )

وتلقى الموضوع وصل عدد صفحاته الى مليون او مليونين صفحه في احيان كثيره وكلها ردود لأعضاء تاريخ تسجيلهم يعود اللى عشر سنين وعدد مشاركات كل عضو من هالأعضاء 1 مشاركة .. وكل الردود تكون من طقة : مشكوووووووووووووووووووووور – واليسلموووووووووووووو – مشششكر خاااالص – ميرسي قدن – الله ياخذ روسكم تعبتوني وخليتوني اسجل واكتب رد وآخرتها الرابط خربان ..

الزبدة وبمحض الصدفة البحته ولا هيّن ما من ذكاء .. احب اعلن عن براءة اكتشافي لطريقة تقدر تاخذ فيها الرابط الي تبيه من هالنوعية من المنتديات من غير تسجيل وبثواني معدودة فقط

مع خليك بالشارع وداعاً لهاك حجب الروابط عن الزوار .. وكلي فخر اني قدرت ابطل مفعول هالهاك الماصل ..

( ملاحظة مهمة : هالطريقه تضبط مع بعض المنتديات موب كلها )

واليكم الطريقة ..

الخطوات:

:: 1 ::

على سبيل المثال كنت تبحث عن رابط اغنية MP3 تبي تحملها ولقيتها بهالمنتدى ..

طبعاً مثل ما انت شايف المحتوى مخفي وعشان تشوفه لازم تحط رد وعشان تحط رد لازم تسجل ولاحظ عدد صفحات الموضوع وكلها يسلمووووووووووووووووووو .. ابوووك يالمشوار ..

:: 2 ::

بهالحالة لا يطق بك عرق بل اجعل العرق يطق براعي المنتدى يومه يشوف عشرين الف زيارة للموضوع ولا واحد من هالعشرين الف سجل عنده بالمنتدى وولارد جا للموضوع من هالعشرين الف زاير وطبعاً هالعشرين الف زاير خذوا من الموضوع الي يبونه وهم يدعون لي من غير تسجيل ولا هم ..

فكيف تسوي ذلك؟!

اذهب الى أدوات الموضوع مثل الي بالصورة وبكل بساطه اختر عرض نسخة للطبع ..

:: 3 ::

وبكل بساطة بتنفتح معك الصفحة التالية وبتلقى الروابط الي بالموضوع كلها انكشفت قدامك ومن ضمنهم الرابط الي كنت تدور عليه .. انسخه والصقه في متصفحك واضغط انتر وانتهى الشرح .. ( انظر الرابط الملون بالأحمر بالصورة )

© حقوق الطبع والنشر محفوظة لـ خليك بالشارع

[ ملاحظة: كل الصور الي بهالدرس مصغره .. اضغط على الصورة علشان تشوفها بحجمها الحقيقي ]

- أولاً -

للحصول على برنامج Adobe Photoshop Lightroom البرنامج الأول للمصورين المحترفين اضغط على الصورة الي تحت ..

بعد التحميل والتنصيب معلومات التسجيل ستكون كالتالي

- ثانياً -

لمعلومات اكثر حول تقنية الـ HDR أو المدى الديناميكي العالي [ High Dynamic Range ] باختصار شديد جداً نقلاً عن موضوع لمشرف منتدى فوتوغرافيا السابق في منتدانا الراحل جسد اللقافة Rayan M ..

المصطلح HDR (والأصح HDRI) اختصار لـ : High Dynamic Range Imaging
اللي هو ( التصوير بمدى ضوئي ديناميكي عالي)

وتم اكتشافه مابين الثلاثينيات والأربعينيات (1930-1940) بواسطة “تشارلز وايكليف”

زين . . . أنا وش دخلني بـ تشارلز اللي قاعد يلف ؟

شلون يعني مدى ديناميكي .. مدري شسمه ؟

العين البشرية ، ياعزيزي ، مداها الديناميكي عالي جداً (بين 9 و 10) .. أما السنسور أو الحساس بالنسبة للكاميرا الديجيتال ، والفلم للكاميرات العادية ، مداهـ الديناميكي منخفض نسبياً
بمعنى أن حساس الكاميرا غير قادر على استيعاب تدرجات متباينة من الإضاءة في وقت واحد

ولذلك العين البشرية تميّز الظل (أو الأماكن المعتمه) والنور (الأماكن المضيئة) بشكل واضح ، ولذلك أيضاً ، ياسيدي الفاضل ، تلاقي ناس مثل حالتي يردد المقولة : ياليل ما أطولك !
قصدي : ليش الصورة ماطلعت مثل ماكنت شايفها ع الطبيعة ؟

ببساطة لأن العين البشرية إبداع وإعجاز . . فـ سبحان من خلق فأبدع !

هَذَا خَلْقُ اللَّهِ فَأَرُونِي مَاذَا خَلَقَ الَّذِينَ مِن دُونِهِ بَلِ الظَّالِمُونَ فِي ضَلَالٍ مُّبِينٍ
[ سورة لقمان 10-11]

ولو تلاحظ أنك إذا اخذت صورة وانت في الظل . . أي شي خارجه راح يكون فيه تعريض زايد
(اللي هو Over Exposure)
والعكس صحيح .. لو اخذت الصورة في الشمس ، أي شي في الظل راح يكون فيه تعريض ناقص
(Under Exposure)

لمعالجة مثل هالمواقف ، ولعرض الصورة بشكلها الصحيح ، يلجأ المصور لتقنية الـ HDR

وطريقتها بسيطة نوعاً ما ، بحيث ياخذ المصور 3 صور لنفس المشهد باستخدام 3 وضعيات تعريض مختلفة ، ثم يدمجها عن طريق برامج معينه

مثال :

تلاحظون الصور الثلاث على اليسار تم التقاطها بثلاث وضعيات تعريض مختلفة
والصورة الكبيرة هي النتيجة النهائية بعد معالجتها بتقنية HDR ، بالإضافة إلى ما يعرف بالـ Tone-Mapping

- والآن -

سموا بالله وتابعوا الدرس المصور لعمل محاكاة تطبيق تأثير الـ HDR على الصور الفوتوغرافية بالاعتماد على صورة واحده فقط! واي استفسار انا حاضر تماماً .. ( وطبعاً مهما كنت بارع باستخدام اللايت روم مستحيل تكون جودة محاكاة الـ HDR بنفس جودة تطبيق تقنية الـ HDR الأصلية باستخدام اكثر من لقطة لنفس الصورة ولكن بتعريضات مختلفة ومن ثم دمجهم بالطريقة المشروحه فوق )

وطبعاً بالبداية هذي هي الصورة الي اشتغلنا عليها اذا حبيتوا تحفظونها عندكم وتطبقون معنا عليها وتشوفون النتيجة ..

ترى الصورة مصغره اضغط عليها عشان تشوفها بأبعادها الحقيقية

- وهنا مثال لقبل وبعد -

- الدرس -

قم برفع الـ Contrast الى 100 +

وبكذا يكون الدرس انتهى ..

وأخيراً اتمنى يكون الشرح مفهوم ..

وأحب ان أنوه ان هالدرس احتاج مني الى ساعات من الاعداد والترتيب والتنقيح ومن ثم اخراجه بالشكل المطلوب وتصديره الى الانترنت وحطه بالمدونة ..

وما دفعني الى ذلك الا ابتغاء الدعاء منكم فلا تنسوني من دعوة صالحة

وعدتكم في تدوينة درس توضيح تفاصيل أكثر بالصور الفوتوغرافية اني احطلكم هالموضوع علشان تصير عندكم خيارات اكثر احترافيه ومنها تقدرون تختارون المناسب لكل صورة من أعمالكم الفوتوغرافية ..

بمعنى صور الناس راح يكون لها درجة توضيح معينة – وصور المدن والعمران والرحلات راح يكون لها درجة توضيح معينة – وكذلك الاستعمال اليومي العام راح يكون له بعد درجة توضيح معينة ..

الزبدة هالدرس بعد مذكور في كتاب “أسرار التصوير الرقمي – الجزء الأول” لمؤلفه “سكوت كيلبي” الي تكلمنا عنه وعن كتابه في تدوينة درس إضافة التوهج حول الأشخاص بالصور الفوتوغرافية .. ويقول “سكوت كيلبي” ان هالطريقه مستعمله على شكل واسع من قبل المحترفين لأنها تخليهم يقدرون يضيفون مزيد من التوضيح بدون التسبب بظهور الهالات السيئة والشوائب اللونية الي يمكن تشوه الصورة اذا كثرنا من التوضيح .. خلونا ندرعم على الدرس :

بعد فتح الصورة الي مخططين نشتغل عليها ببرنامج الفوتوشوب ..

(1) نروح لقائمة الصورة Image ومن قائمة الصيغة Mode نختار صيغة ألوان Lab Color.

(2) نروح بعد كذا للوح القنوات Channels ونرعص على قناة الإضاءة Lightness .. ( للمعلومية: هالقناة تحتوي على التفاصيل بس موب الوان الصورة .. وبكذا راح نتجنب بعض مشاكل الألوان الي تطلع بسبب توضيح الصورة بالألوان الكاملة ).

(3) والحين نطبق على الصورة فلتر قناع التوضيح Unsharp Mask بالقيم الي راح اشرحها لكم الحين بالصور ..

لأحسن توضيح لصور الناس نضبط الفلتر بالاعدادات هذي ..

ولأحسن توضيح لمشاهد المدن وصور العمران أو الرحلات نضبط الفلتر على هالاعدادات ..

وأخيراً لتوضيح الصور بشكل عام وللاستعمال اليومي نضبط الفلتر على هالاعدادات ..

(4) طبعاً حاول تطبيق فلتر Unsharp Mask مرة ثانية اذا كان الوضع محتاج زيادة توضيح باستعمال نفس القيم الي فوق بس اذا حسيت الصورة صارت حادة بزيادة قبل لا تسوي اي شي ثاني رح لقائمة التحرير Edit واختر تخفيف قناع التوضيح Fade Unsharp Mask.

(5) في المربع حق اعدادات تخفيف قناع التوضيح حط قيمة الـ Opacity على 50% علشان تحصل على نص قوة التطبيق الثاني لمفعول الفلتر.

(6) والحين نرجع الى قائمة الصورة Image من قائمة الصيغة Mode ونختار ألوان آر جي بي RGB.

وهذي كل السالفة  

## الخطوة الأولى ##

ببرنامج الفوتوشوب نفتح الصورة الي نبي نشتغل عليها ونضاعف الشفيفة أو اللير بالضغط من لوحة تحكم الكمبيوتر على Ctrl و J مع بعض في نفس الوقت مثل التطبيق الي تحت ..

الصورة الي طبقنا عليها الدرس

ضاعفنا الشفيفة بالضغط على الاختصار Ctrl+J

## الخطوة الثانية ##

من قائمة Filter نختار Other ثم نختار High Pass على اللير الأول ( الطبقة الجديدة الي ضاعفناها من الصورة ) .. شف التطبيق الي تحت ..

وبعدين نضغط موافق أو OK بعد ما نختار القيمة الظاهرة بالتطبيق الي تحت .. وشف النتيجة بنفس التطبيق بعد ..

## الخطوة الثالثة ##

نغير خصائص اللير الي طبقنا عليه الفلتر الي فوق طبعاً من Normal إلى Hard Light .. مثل التطبيق الي تحت ..

## النتيجة النهائية ##

والحين اقعد استمتع بالنتيجة النهائية للدرس وادعيلي 

إذا اعجبكم هالدرس .. راح احطلكم قريب ان شاء الله درس توضيح الصور وزيادة حدتها بطريقة ثانية وسهلة جداً بعد .. تابعوني ..