طيب ليه ما يحولون روايتي عجبت من بحر ليس له ساحل.. ومن ليل ليس له فجر!! (+18) الى فلم سينمائي انا بعد دام الدعوه سهاله؟!
يعني وش زود رجاء الصانع عني!!
إذا من ناحية الخشم .. أنا بعد خشمي كبير ..
ولا عشان اسمي مهب خليكه بالشارعه وانسان غير متبرجه! ..

نجي للمهم ..

يقولكم فيه مخرج امريكي منتف اول مره اسمع عنه ما لقى الا رجاء الصانع تعطيه وجه اسمه “تيود نمز” وهو من مواليد الظهران سنة 1980م وذلك لأن ابوه كان يشتغل في شركة أرامكو السعودية وتقاعد السنة الي راحت .. وتيود معه بكالوريوس إعلام في مجال الانتاج السينمائي .. وماله من أعمال الا فلم تسجيلي واحد اسمه ( وطني ) مدته 90 دقيقه .. سواه قبل سنتين ونص في عاصمة الأفلام السينمائية هوليوود وعرضوه في ثلاث ولايات امريكية ..

وقال المخرج الأمريكي “تيود نمز” إنه يبي يحول رواية “بنات الرياض” لطبيبة الأسنان السعودية رجاء الصانع إلى فلم سينمائي!

والروايه باختصار للي ما قروها تسولف فيها رجاء الصانع عن أربع بنات يدورون على الحب ( حبهم برص ) في اي مكان .. حتى لو سواق بيت جيرانهم عادي ..

وهم:

قمرة الي اكتشفت ان زوجها خانها ثم قالت له طلئني يا مقرم وطلقها ثم راحت تبحث عن الحب في رواية بنات الرياض ( يا عيني على الأهداف النبيله ) ..

وسديم الي قعد خطيبها ( اللوح ) يحوقن على راس اهل من جابها يبي يضاجعها قبل ليلة الدخله ويوم وافقت بعد الكثير من الترجّي والتهديدات نفص عيونه فيها وقال لها بكل ذكاء ونظره حاده ثاقبه: لااااه يا بنت الكلب! .. اثرك عادي عندك تضاجعين قبل الزواج! ( لا ذكي الولد ) .. وطبعاً ترتب على ذلك ان سحب عليها وتركها محترقه كعود الكبريت ما ينفع احد يولعها مره ثانيه ..

ومشاعل الي عيّت ( رفضت ) ام الي كان ناوي يخطبها انها تخطبها له علشان ام “ميشيل” امريكية ..

وأخيراً لميس .. الشقه عليها والشراب برضوا عليها ..

هالداشرات الأربع كانوا محور الخنبقه التي حولها الإعلام بقصد أو بدون قصد الى “رواية” والي ما جازت لكثير من أبناء وبنات مجتمعنا السعودي المحافظ لدرجة ان عدد اثنين مواطنين سعوديين غيورين رفعوا قضيه على المؤلفة بس ما ندري وش صار على القضيه .. والله لا يلومهم بصراحه .. انا قريت من الروايه فصلين بغيت اطرش ..

يؤخذ على المؤلفه انها سمت الرواية الي اعطيتكم زبدتها قبل شوي بـ “بنات الرياض” وكأنها تصف كل بنات الرياض على انهم “قمرة وسديم ومشاعل أو ميشيل ( سماجة ) ولميس” .. مع العلم انها لو استثنت لميس من الروايه واهتمت بـ قمرة وسديم ومشاعل كشخوص أساسية لروايتها ثم سمتها “البقرات الثلاث” لكان خفت حدة وطأة الرواية على نفوس العباد والبلاد ولهوجمت بس من منطق ان الرواية قليلة أدب ..

الزبدة وشلون يبي يحول “تيود نمز” رواية “بنات الرياض” الى فلم سينمائي مدري! ..
الظاهر انه ما يفهم عربي ذاك الزود بس طار بالعجه يومه شاف الروج اللماعي يلمع على براطم الكاتبه والضجه الإعلاميه الي صارت حول الروايه بسبب خدشها لحيائي كمواطن سعودي مؤدب وعفيف عشت وترعرعت في بيت علم دين وظن انه بيخرج في الأخير بفلم لرواية لا تقل روعه عن رواية “شيفرة دافنتشي” للروائي العبقري “دان براون” ..

والي مجنني وشلون قدر يقراها وهو اللغة العربية عنده الله بالخير!! .. وليت الروايه مكتوبه بلغه عربيه فصيحه او حتى بلغة مثل الناس على الأقل عشان نقول يمكن “نمز” متعلم اللغة العربية ويعرف يقرا ويفهم عربي!

يقول “نمز” انه راح يغير في بعض شخوص الرواية لأن فيها اسقاطات أدبية! ..
وذلك لأنه اذا حول “تيود” الروايه بحذافيرها وحرفياً مثل ما كتبتها رجاء الصانع الى فلم سينمائي ما راح توافق ولا قناة على عرضه عندها الا XXL على الهوت بيرد بعد الساعه وحده بالليل ..

باقي عاد نعلمكم منهي ابرز ابطال هالفلم الخايس ..

هي الفنانة الخليجية المعروفه “وعد” الي أكدت قبل كذا على انها شكلها راح يخلونها تمثل دور “مشاعل أو ميشيل في الروايه” .. ولكن الفنانة “وعد بلفور” ( <== هذا اسمها الفني الجديد بعد ما مثلت بالفلم ) .. قعدت تتشرط شروط كثيره ( مهيب عاقله دينزيل واشنطون ) من ابرزها انها تبي انتاج ضخم ومهب حي الله انتاج .. وتبي فريق عمل محترف .. وتبي ممثلين مخضرمين ( وهنا قلت بسري: عشم ابليس .. اجل مخرج سلتوح ابوه كان يشتغل بارامكو بالظهران مدري براس تنوره وتوه متقاعد السنة الي راحت ومؤلفة الرواية طبيبة اسنان والفلم احتمال كبير ما راح يُعرض الا على XXL وتبين ممثلين مخضرمين! .. لا ولا نفسي اشوف شكل جوني ديب وهو لابس شماغ وعقال وقاعد يستدرج خطيبته سديم الى وحل الرذيله قبل الدخله .. يا جماعه تحمدون ربكم اذا وافق يمثل معكم بشير غنيم! ) .. وأخيراً قالت “وعد” تبي المخرج ذي الرؤية المميزة ( تبين مخرج ذو رؤية مميزه؟ .. مالكم الا عبدالخالق الغانم ) ..

هذا ونسأل الله ان يجيب العواقب سليمه ..

خليك بالشارع
http://www.mamdou7.com/
جميع الحقوق محفوظة © 2008