هالدرس مهم جداً للمصورين الفوتوغرافيين

وعدتكم في تدوينة درس توضيح تفاصيل أكثر بالصور الفوتوغرافية اني احطلكم هالموضوع علشان تصير عندكم خيارات اكثر احترافيه ومنها تقدرون تختارون المناسب لكل صورة من أعمالكم الفوتوغرافية ..

بمعنى صور الناس راح يكون لها درجة توضيح معينة – وصور المدن والعمران والرحلات راح يكون لها درجة توضيح معينة – وكذلك الاستعمال اليومي العام راح يكون له بعد درجة توضيح معينة ..

الزبدة هالدرس بعد مذكور في كتاب “أسرار التصوير الرقمي – الجزء الأول” لمؤلفه “سكوت كيلبي” الي تكلمنا عنه وعن كتابه في تدوينة درس إضافة التوهج حول الأشخاص بالصور الفوتوغرافية .. ويقول “سكوت كيلبي” ان هالطريقه مستعمله على شكل واسع من قبل المحترفين لأنها تخليهم يقدرون يضيفون مزيد من التوضيح بدون التسبب بظهور الهالات السيئة والشوائب اللونية الي يمكن تشوه الصورة اذا كثرنا من التوضيح .. خلونا ندرعم على الدرس :

بعد فتح الصورة الي مخططين نشتغل عليها ببرنامج الفوتوشوب ..

(1) نروح لقائمة الصورة Image ومن قائمة الصيغة Mode نختار صيغة ألوان Lab Color.

(2) نروح بعد كذا للوح القنوات Channels ونرعص على قناة الإضاءة Lightness .. ( للمعلومية: هالقناة تحتوي على التفاصيل بس موب الوان الصورة .. وبكذا راح نتجنب بعض مشاكل الألوان الي تطلع بسبب توضيح الصورة بالألوان الكاملة ).

(3) والحين نطبق على الصورة فلتر قناع التوضيح Unsharp Mask بالقيم الي راح اشرحها لكم الحين بالصور ..

لأحسن توضيح لصور الناس نضبط الفلتر بالاعدادات هذي ..

ولأحسن توضيح لمشاهد المدن وصور العمران أو الرحلات نضبط الفلتر على هالاعدادات ..

وأخيراً لتوضيح الصور بشكل عام وللاستعمال اليومي نضبط الفلتر على هالاعدادات ..

(4) طبعاً حاول تطبيق فلتر Unsharp Mask مرة ثانية اذا كان الوضع محتاج زيادة توضيح باستعمال نفس القيم الي فوق بس اذا حسيت الصورة صارت حادة بزيادة قبل لا تسوي اي شي ثاني رح لقائمة التحرير Edit واختر تخفيف قناع التوضيح Fade Unsharp Mask.

(5) في المربع حق اعدادات تخفيف قناع التوضيح حط قيمة الـ Opacity على 50% علشان تحصل على نص قوة التطبيق الثاني لمفعول الفلتر.

(6) والحين نرجع الى قائمة الصورة Image من قائمة الصيغة Mode ونختار ألوان آر جي بي RGB.

وهذي كل السالفة