[ رحلـة الحلميــة ]

[اهاا بس اهاا]

بسـم الله الرحمـن الرحيـم

الســلام عليكـم ورحمـة الله وبركاتــه


؛؛

مدخـل صغيــّر ..:

آحـب آنـوهـ بإن هالموضـوع سبـق وآن تم طرحـه في حـدا الساحات السآخـرهـ آو اللي تحـآول تكـون سآخـرهـ بـ مجهـود الآفـراد اللي فيهـآ .. وكـان تاريــخ طـرح الموضـوع والوقـت

03-06-2007, 9:30 ص


تم التنويـه على هالنقطــة .. تلافيـاً لأي آنبـرآش أو آتهـآم بـ سرقــة الموضــوع


وآيضـآ .. آعتبـر هالموضــوع بدايـة أو تجربــة .. تحتـاج للتقييـم والنقــد والتوجيــه .. من جميـع النوآحي


آترككـم مع ماقـدرت آطلعـه من خيــآل مآصــل


؛؛

كنـت شخـص مواطـن مثلـي مثـل أي مواطـن شـاب يحلـم بإنـه يكـون بيـت وأسـرة ويكـون عنـدهـ زوجـة تدلعـه ويدلعهـا يمـدهـا وتمـدهـ ومن هالكــلام .


لكـن مالكـ بالطيـب نصيـب ابـدا .. كنـت كل ماطقهـا عوجـه .. اروح لهـا يميـن تـروح يسـار .. اروح لهـا يسـار تـروح يميـن .. اروح لهـا في بيتهـم يقولـون في بيـت خالتهـا .. اروح لهـا في بيـت خالتهـا يقولـون توهـا طالعـة لبيتهـم .. ياربيـه وش السـواة .!

رجعـت البيـت وادخـل الغرفـة الامبراطوريـة .. وانسـدح على العـرش الجمهـوري واغـط في نـوم عميـق .. لكـن صحيـت في منتصـف الغطـة .. فقلـت وش السالفـة .. صـارت السالفــة إني مـادري شفينـي .. حسيـت اني خـلاص بانقلـب لـ جنـس آخـر .. لا ذكر ولا انثى ولا حتى ثالـث .. قلـت افـااا عسـى بـس ماصـرت جنـس رابــع .؟


المهـم وانا اللي اقـوم من السريـر اللي هـو العـرش الجمهـوري .. واروح افتـح الـدولاب وانـزل الشنطـة واحـط فيهـا ماطاحـت يـدي عليـه من مـلابـس .. لأني خــلاص قـررت إنـي

اهــاجــــر


المهـم طلعـت من البيـت مشـي واطلـع ع الدائـري الشرقـي باتجـاهـ المطـار .. وامشـي وامشـي وامشـي .. واوقـف لاني تعبـت شـوي .. واكمـل امشـي وامشـي وامشـي وأوقـف لأني حسيـت اني بتعـب فحبيـت افاجـأ التعـب بأني وقفــت .. المهــم وارجـع امشـي وامشـي وامشـي واطلـع ع الدائـري الشمالـي وامشـي وامشـي وامشـي مشـي مهـب صاحـي واطلـع على خـط الميـة .. خـلاص نـاوي الهـجــرة .. بس مادري ويـن اهاجـر .


قلـت في نفسـي حالي حال هاللي يجـون من بـرى السعوديـة بفيـزة عمـرهـ ويجلـس في مكـة .. قلـت بـروح لمكــه .. والله واكمـل المشـوار مشـي .. المهـم تعديـت المزاحميـة والقويعيـة وكلـش .. اذكـر اني طلعـت من البيـت الساعــة 11 قبـل الظهـر .. ماجـات الساعـة 4 العصـر الا أني في ديـرة اسمهـا ( جـو ) .. عـاد من الاستظـراف اول ماقريتهـا في اللوحـة قلـت جـو ولا راحـوا .. المهـم هـي قبـل ماتوصـل الطايـف بحـوالي 250 كيلـو تقريبـا ان ماخاب ظنـي يعنـي .


المهـم وامشـي وامشـي وادخـل الطايـف .. ورايـح خــلاص لمكــه .. قلـت مانيـب رايـح مع طريـق السيـل الكبيـر لأنه بيكـون زحمـة وباصـات حمـلات الحـج والعمـرهـ والذي منه .

قـررت اروح مـع طريـق كـرا .. يـوم وصلـت الهـدا .. وانا اللي اوقـف عنـد مباسـط قبـل نزلـة كـرا .. يبيعـون فواكـه وخضـار وبعضهـم يبيـع قيـرو :d


وقفـت عنـد حـدا هالمباسـط .. السـلام عليكـم وعليكـم السـلام .. كيـف حالكـم .. انا جايكـم مهاجـر من الريـاض مشـي .. قالي اللي واقـف عنـد المبسـط .. اقول فـارق بس بلا ملاحيـس .. اجل جاي مشـي .. قلـت اي والله اني جـايكـم من الريـاض مشـي .. حتـى هاه شـف الشنطــة ماركـة الريـاض .

قالي وش تبـي طيـب .. قلـت الله لايهينـك قشـرلـي برشـوم وحطـه في باغـه وحـط معهـم قيـرو حـق الطريـق :d

المهـم ماعطاني وجـه .. قلت ياخي شفيك شايف نفسـك .. يعني عشـان عندكـم هـواء بـارد ومطـر .. ترى حتى إحنـا عندنـا بالريـاض مطـر وهـواء حـار .. حتـى المطـر يجينـا فجـأة بدون ماندري .. يالله وخـر بس


واكمل مشـواري مشـي .. عـاد وقفـت عنـد النزلـة واطالـع زحمـة سيـارات الصيانـة وقالـوا طـس بعيـد الطريـق مقفـل الى السنة الجايـة عشـان يكملـون عمليـة الازدواج حقـه .. قلـت طيـب من ويـن اروح قالـوا رح مع طريـق السيـل الكبيـر .. قلـت والله اللي ماطرالي ارجـع مـرة ثانيــة .

وقفـت على طـرف حـدا هالجبـال اللي عنـد النزلـة .. واطلـع البراشـوت من الشنطـة والبســه .. النـاس كلهـم يحسبـوني ملحـوس وماسكـه على انتحـار .. قلـت ثـلاث ثنيـن واحــد فمـان الله .. والله اجيـكـ طاب محيفـرة لمكــة .

عاد خـلال الطبـة من نزلـة كرا .. وانا منتصـف الطريـق طالعـت الساعـة لقيتهـا حـول الساعـة 6 المغـرب .. واخـذلي غطيطـة حقت ابو نص ساعـة .. ما امداني اغـط .. الا انا داج على دمجتـي قبـل تفتيـش مكـة .


وش عندكـ .. ابـدا ماعنـدي شيء بـس انا جاي لمكـة مهاجـر من الريـاض .. قالـي رح رح بلا ملحـس .. قلـت شسالفتهــم هالبشـر .. يعني اول مـرة يشوفون واحـد مهاجـر ..!


والله وانا اللي اتجـه لمكـة .. واشـوف لوحـة مكتـوب عليهـا طريق غير المسلميـن وجـدة .. قلت والله فكـرة مهب شينـة لو اطلـع لجـدة .. منهـا اشوف اهل جـدة ومنهـا اخـذلي لفـة بوسـط البحـر .

طلعـت لجــدة .. وقفـت ع الكورنيـش .. واطالع الساعـة قدهـا ع الساعـة 9 ونـص عقـب العشـااء .. قلـت مانيـب داخلـن البحـر والوقـت ليــل .. لأني اسمعهـم يقولون البحـر غـدار .

حطيـت راسي عنـد الكورنيـش وصحيـت على ازعـاج الغربـان عقـب صـلاة الفجــر .. المهم صحيـت ولا ماصحيـت وانا اللي افصـخ الثـوب واصفطـه وحطـه بالشنطـة .. وافصـخ الفنيلـة واصفطهـا واحطهـا بالشنطـة .

واربط الشنطـة بحبـل واربطـه برقبتـي واطب محيفـرة .. واالله وانا اللي اسبـح واغـوص وانا مادري عن نفسـي .. مستاااااااااانـس جـدن .. فجـأة حسيـت بشـيء ينغزني .. اطالع يميـن الا اشـوف قـرش .. قلـت يبو فكنـا من المشاكل وخلنـا نحلهـا ودي .. قال رح مسافة كيلـو وبطرد وراكـ ان لحقتكـ اكلتكـ وان مالحقـت فاحمـد ربكـ .. والله وانا اللي افكهـا سبـرنت كيلـو وشـوي .. واوقـف واطالـع وراي الا اشـوف القـرش جـاي موووحـف .. سويت نفسـي ذيـب وانكـس يميـن .. يعنـي صـار اتجاهـي شمـال .. والله وانا اللي اسبـح واسبـح واغـوص واسـوي حركـات بعـد .. ماوعيـت الا انا عنـد مينـاء العقبـة .. والله واطلـع من البحـر واجلـس اتمشـى في الأردن مصفـخ ماعلي الا صـروال مقوصـر .. والعـالم تفـرج علي تقول شو هـاظ يازلمـة .


المهـم واطلـع من حـدود الأردن وادخـل على فلسطيـن .. قلت باروح لرئيـس الوزراء واحاول اقنعـه انهـم يوقعـون اتفاقيـة سـلام اهااا بس 2007


بس مـاش شفتهـم ماغيـر مشالـخ في بعـض .. قلـت مهب لازم اتفاقيـات .. والله واجلـس على شواطي مدري شسمهـا في اسرائيـل واشـوف ذيكـ الغـزال اللي تشـق الوجــه سبحـان من ابـدع في خلقتهـا .

شفتهـا تسبـح في البحـر وراحـت بعيــد .. قلـت افـااا لايكـون غرقـت .. وانا اللي اعلـق الشنطـة مـرة ثانيـة واطـب محيفـرة للبحــر .. واسبـح واسبـح واسبـح واشطفهـا من قـوة السباحـة .. حاولت افرمـل بس ماش ماربط معي صحيح .. قلـت بكمـل طريقـي واشوف وش نهاية هالموضوع اللي جاء غلـط .

وقفـت بنص البحـر وانا احركـ رجولي عشان اكون متواسـي .. واحط يدي عنـد جبهتـي عن قولـة تحـديـد المكان المقابـل .. والله واقـزلي جزيـرة .. قلت فرصتكـ ياولـد تصيـر حاكـم الجزيـرة الفلانيـة .

واعـود اسبـح واسبـح ليـن وصلــت للجـزيـرة .. والله وانا اللي انزل الشنطـة وافصـخ نعيلاتي عنـد مدخـل الجزيـرة واروح اتمشـى فيهـا .. تسنـي لمحـت زول غـزال ثاني .. شوي مادريت الا اللي تقـولي سلـم نفسـك .. شعندكـ وش جابـك .. قلـت لهـا عن المـزح البايـخ انا رجالـن مهـاجر من الريـاض مرورا بالطايف ومكـه وجـدة وبحـر وقـرش وعقبـة واسرائيـل وقررت استقـر في هالجـزيـرة .


قالت معصـي .. قلت اخس .. شكلتـس من نجــد .. قالـت ايه من نجـد .. قلت لهـا اتركي عنتـس الشـر وخلينـا نسمـر لنـا كم ليلـة فيـذا الجزيـرة ماحولنـا احـد .. خلينـا نوسـع صـدرونـا شـوي .. قالت شـوركـ وهـداية الله .


والتفـت عليهـا واقول هالوجـه مهب غريـب علي .. اثرهـا هـذيكـ اللي كنت الحقهـا في البحـر .. اثرهـا هي بعـد يوم شافتني اسبـح ويطردني القـرش ونكسـت يميـن .. صارت تلحقني وسبقتني تبي تنقذني لبى قلبهـا خايفتن علي اغـرق .


المهـم عـدت الليلــة الاولى والثانيـة وكل الامور ماشيـة في السليــم .. الليلـة الثالثـة ماش الشيطـان قم يقـول افاا ياذا العلـم لحالكم ماحولكم لاهيئـة ولاحد ولا تسوي شيء .. طيب نظـرة ولو جبر خاطـر .. المهم انصعـت لكلام الشيطـان واجلـس اناظر فيهـا من فوق لتحـت .. قالـت اوووف حتى نظراتكـم واصلـة هنا لهالجزيـرة .. اثرهـا تقصـد بنت الكلـب نظرات شبـاب الرياض للبنـات .


قلت يابنت النـاس الشيطـان ملعـون جـد .. انا بمشـي .. قالت والله ماتمشـي .. قلت يابنت الحـلال بروح اسيـر ع المغـرب واجيتـس وانا راجـع .. قالـت فمـان الله .


وانا اللي البـس نعيـلاتي واعلـق شنطتـي واطـب محيفـرة في البحـر متجه للمغـرب .. والله وانا اللي اسبـح واسبـح واسبـح .. مادريت الا انا متشبـث بشبكـ .. حاولت افكـ عمـري منه بس ماش .


بعدهـا بيـوم كامل جاني خفـر السواحـل حق اسبانيـا .. اثرهـم حاطيـن هالشبـك للمغاربـة المهاجريـن الغير شرعييـن لديرتهـم .. والله ويلقطوني لمكتبهـم ويجلسون يحققون معـي .. شعندكـ وماعنـدكـ ومن انت وليـه ومن هالكـلام .


عـاد انا ماتكلمـت .. قلت لهـم مانيـب متكلـم الا بوجـود محامـي .. قالـوا اجـل انطـق بالتوقيــف ليـن يجيكـ محامـي .. عـاد الحيـن انا الله ميـر يسلمكـم اكتـب لكم هالموضوع من التوقيـف في اسبانيـا .. بس مابي محامي ولا شيء .. ابدن مستااااااانس فيـذا .. معي في التوقيـف مغاربـة من النـوع الطيـب .. وابشركـم اعرسـت .. تعرفت على مهاجر غير شرعي مغربـي ويا اختـه .. عرضـت عليـه يشتغـل بكوفي شـوب في التحليـة مقابل الزواج من اختـه .. و وافـق على طـول يخليـه ربي .


يالله بروح لحرمتـي تحترينـي في زاويــة التوقيــف عندنـا سالفــة ماتصلــح للنشــر .. ماغيـر ساعـة بس :7arrah:


؛؛

آعيــد وآكــرر بإن هالموضــوع بدايـة أو تجربــة .. تحتـاج للتقييـم والنقــد والتوجيــه .. من جميـع النوآحي

للجميـــع خالـص التحايــا


أ. هـ. ب

[قطوة مدعوسة]

احم:yahooshy: مدري قصتك بصراحه روووعه :online::)<<من جد ضحكت لين قلت ربي الله :):fa6esmnallolz:
بس فيه ملاحظه انت تقول انه طلع على ميناء العقبه من دون
شنطه وفجأة طلعت معه الشنطه في اسرائيل:coolsmoker: مدري كيف صار كذا يعني ياليت تركز اكثر وانت تقص<<تتفلسف عليك<<طراق اذا ودك:mwalle3:
وش حاسبنا اغبياء ماننتبه<<ودها تتطاق:tongue:
اذا كانت بدايتك هكذا اخي العزيز فانت رجل ناجح<<وش جاب لجاب :yestahbel:
الموهم واصل سيرك وننتظر الاروع;)

وماشاء الله طريق الهجرة من اروع ماخترت مكــه شرفها الله وفلسطين:mestanes: لا لا انت بصراحه مرة عربي واصيل بس فيه سؤال اذا منكن::yahooo:
ليه انحرفت ورحت اسرئيل ياوليدي:yahoohuh: الله يصلحك وهـ بس؟؟:what:

:solong:لاتحرمنا من روائع قلمك ودمت :)

[loty spot]

هههههههههههههههههههههههههههههههههههههههههههههههههه ههههههههههههههه

والله قصتك روووعه..

قالي وش تبـي طيـب .. قلـت الله لايهينـك قشـرلـي برشـوم وحطـه في باغـه وحـط معهـم قيـرو حـق الطريـق

المهـم ماعطاني وجـه .. قلت ياخي شفيك شايف نفسـك .. يعني عشـان عندكـم هـواء بـارد ومطـر .. ترى حتى إحنـا عندنـا بالريـاض مطـر وهـواء حـار .. حتـى المطـر يجينـا فجـأة بدون ماندري .. يالله وخـر بس


ههههههههههههههههههههههههههههههههههههههه


واربط الشنطـة بحبـل واربطـه برقبتـي واطب محيفـرة .. واالله وانا اللي اسبـح واغـوص وانا مادري عن نفسـي .. مستاااااااااانـس جـدن .. فجـأة حسيـت بشـيء ينغزني .. اطالع يميـن الا اشـوف قـرش .. قلـت يبو فكنـا من المشاكل وخلنـا نحلهـا ودي .. قال رح مسافة كيلـو وبطرد وراكـ ان لحقتكـ اكلتكـ وان مالحقـت فاحمـد ربكـ .. والله وانا اللي افكهـا سبـرنت كيلـو وشـوي .. واوقـف واطالـع وراي الا اشـوف القـرش جـاي موووحـف .. سويت نفسـي ذيـب وانكـس يميـن .. يعنـي صـار اتجاهـي شمـال .. والله وانا اللي اسبـح واسبـح واغـوص واسـوي حركـات بعـد .. ماوعيـت الا انا عنـد مينـاء العقبـة .. والله واطلـع من البحـر واجلـس اتمشـى في الأردن مصفـخ ماعلي الا صـروال مقوصـر .. والعـالم تفـرج علي تقول شو هـاظ يازلمـة .

هههههههههههههههههههههههههههههههه

خخخخخ احلى شي قرش يعزك لاا باقي شوي وتجلسوون تمزحوون مع بعض يغزك وتغززه :d:d:d

ياخيي وش فييك تنحااش منه تراا يبي يلعب معك طييره خخخـ :d


المهـم عـدت الليلــة الاولى والثانيـة وكل الامور ماشيـة في السليــم .. الليلـة الثالثـة ماش الشيطـان قم يقـول افاا ياذا العلـم لحالكم ماحولكم لاهيئـة ولاحد ولا تسوي شيء .. طيب نظـرة ولو جبر خاطـر .. المهم انصعـت لكلام الشيطـان واجلـس اناظر فيهـا من فوق لتحـت .. قالـت اوووف حتى نظراتكـم واصلـة هنا لهالجزيـرة .. اثرهـا تقصـد بنت الكلـب نظرات شبـاب الرياض للبنـات

:d:d:d

اي طيب زييين انك عاارف ومعترف .. بحاالكم ..

طبعاا لازم تدخلوون ذي السالفه في الموضووع ولا مااش مازبط معكم :d

الله يعيينكم على نفسكم :d


....................

مبرووك على الزوااج :d

تعاال سؤاال غبي ولا انا ملخبطه ولا مدري وش السالفه ..

هذاا كلله انت تمشي برجوولك ..؟؟؟؟ :d :gam6ah:


يلاا

تقبل ردي و ننتظر جدييدك ..

سياا

[خليك بالشارع]

تو ما نور المنتدى اهاا بس اهاا :shy:

وكانك تبي رايي بصراحه الموضوع خفيف دم وتملك الموهبه للكتابه الساخره بس ما كان
في الموضوع قصة معينه :frown:

والحين نروح للاقتباسات :d

كنـت شخـص مواطـن مثلـي مثـل أي مواطـن شـاب يحلـم بإنـه يكـون بيـت وأسـرة ويكـون عنـدهـ زوجـة تدلعـه ويدلعهـا يمـدهـا وتمـدهـ ومن هالكــلام .


لكـن مالكـ بالطيـب نصيـب ابـدا .. كنـت كل ماطقهـا عوجـه .. اروح لهـا يميـن تـروح يسـار .. اروح لهـا يسـار تـروح يميـن .. اروح لهـا في بيتهـم يقولـون في بيـت خالتهـا .. اروح لهـا في بيـت خالتهـا يقولـون توهـا طالعـة لبيتهـم .. ياربيـه وش السـواة .!

رجعـت البيـت وادخـل الغرفـة الامبراطوريـة .. وانسـدح على العـرش الجمهـوري واغـط في نـوم عميـق .. لكـن صحيـت في منتصـف الغطـة .. فقلـت وش السالفـة .. صـارت السالفــة إني مـادري شفينـي .. حسيـت اني خـلاص بانقلـب لـ جنـس آخـر .. لا ذكر ولا انثى ولا حتى ثالـث .. قلـت افـااا عسـى بـس ماصـرت جنـس رابــع .؟


المهـم وانا اللي اقـوم من السريـر اللي هـو العـرش الجمهـوري .. واروح افتـح الـدولاب وانـزل الشنطـة واحـط فيهـا ماطاحـت يـدي عليـه من مـلابـس .. لأني خــلاص قـررت إنـي

اهــاجــــر

مُقدمة القصة تعمل على تهيئة القارئ لأحداث القصة فيما بعد ومن الضروري انها تكون قمة في الجودة والتشويق وبها نوع من الإثارة والغموض عشان تحسس الي بيقرا انه راح يطب محيفره باحداث مشوقه فيما بعد .. يعني حاول تخلي القارئ بعد ما ينتهي من قرائة المقدمة يغرق في مئة سؤال وسؤال عشان يحركون عنده عنصر الفضول لمعرفة الإجابة وهذا الي راح يخليه يسترسل في القراءة أكثر ..

غالباً راح تكون الإجابه في القصص الساخره او الكوميديه مشابهه لنكتة : ( فيه منديل طاير بالهواء ليه؟ ... عشان فيه ذبانه :d ) .. اول ما سمعنا النكته قعدنا نقول يمكن عشان الهواء مطيره بس ما توقعنا ان نهاية النكته تبي تكون انه بوسط ذا المنديل ذبابه وهي الي مطيره المنديل :d ..

ومقدمتك كان ينقصها الترابط .. يعني في البداية عندما اقرأ انك مواطن تحلم ببيت وزوجه ودلع ومقاضي ووجع راس وليش فاتح المسنجر ومن ذا السوالف تجعل القارئ يتوقع ان الأحداث ستكون انك تزوجت وبعدين اكتشفت ان الزواج ماله داعي بطريقة أو بأخرى فبيبدا القارئ يسأل نفسه ذا السؤال "ليش زواجه ما كان له داعي؟!" :d

ثم فضوله يبي يدفعه عشان يعرف الجواب! :d

وطبعاً كل ما كان الموضوع خيالي اكثر كل ما كان عنصر التشويق المحرك للقافة البشرية اكبر .. ولكن خيال مترابط وركز في نفس السالفة والموضوع .. ولا تحاول تتشعب لأكثر من فكره بل خلك في فكرة وحده ولكن تشعب فيها :d ..

نرجع لموضوعك سيتفاجأ القارئ الي هيأ نفسه لقراءة قصة حياة زوجية فشلت بأنك فجأة مسكت به خط الى موضوع آخر وانت ما زلت في طور المقدمه :coolsmoker:

وهو انك ما كان لك بالطيب نصيب .. ثم لفيت الدركسون فجأة ومسكت بالقارئ خط ثاني غير الخط الي قبله وبدون اية ممهدات لذلك وهو انك رجعت للبيت ونمت ثم تحولت الى جنس رابع :d لتقرر بعد ذلك فجأة بعد الهجره ..

وهنا القارئ صار ما يدري وش القصة الي بيقراها بالضبط :d

وبدأت بوصف الطريق من بيتكم بالرياض الين الجزيرة الفلانية مع مجموعه من الأحداث الكوميديه ولكن تفاجأنا ان السالفة انتهت بتوقيفك عن طريق خفر سواحل اسبانيا فيما بعد :d

للأسف يا صديقي اهااا بس اهااا القصة ما اجيزها للتثبيت :d

لأني اتوقع يجي منك اقوى من كذا ولأنك بالفعل قادر على أقوى من كذا ان شاء الله .. ولكن يبيلك طول نفس ومخمخه اكثر وتعتيق للموضوع وقراءة اكثر لقصص ساخرة لناس يعجبونك :d

هذا سبب ..

السبب الثاني ..

مابي اجاملك وانصب عليك لأن هذا الشي ما راح يخليك توصل للي تبيه دامك حاب الشغله ..

السبب الثالث ..

انك طلبت التوجيه وحبيت اكون صادق معك ..

السبب الرابع ..

ترى الدعوه شباب وفله والزعل عندنا مرفوض :d

وأخيراً اخوك مبسوط كثير بتسجيلك معنا وبانتظار جديدك المسكت ان شاء الله :ok:

[اهاا بس اهاا]

قطـوة مدعوســة

:،:

احم مدري قصتك بصراحه روووعه <<من جد ضحكت لين قلت ربي الله

ياعساهـ كل أبو دايـم الضحـكـ .. بس انتبهي لأنهم يقولون إن اللي يضحكـ كثيـر يصيـر قلبـهـ فضيــخ :d

بس فيه ملاحظه انت تقول انه طلع على ميناء العقبه من دون
شنطه وفجأة طلعت معه الشنطه في اسرائيل مدري كيف صار كذا يعني ياليت تركز اكثر وانت تقص<<تتفلسف عليك<<طراق اذا ودك
وش حاسبنا اغبياء ماننتبه<<ودها تتطاق

هاهـ :gam6ah:

وراتس الله يصلحتس شاشيتـن علي الحيـن
يابنت الحــلال لا تدققين وآجـد .. قسم بالله التدقيق الاكثـر من اللازم يسبب حساسية مزمنة في البطين الأيسـر من الرئـة السفلى :yestahbel:

اذا كانت بدايتك هكذا اخي العزيز فانت رجل ناجح<<وش جاب لجاب
الموهم واصل سيرك وننتظر الاروع

احس إني جالس قـدام دكتور جامعي شايف نفسـه مرررهـ وودهـ يصرفني بس ماعـرف :d

وماشاء الله طريق الهجرة من اروع ماخترت مكــه شرفها الله وفلسطين لا لا انت بصراحه مرة عربي واصيل بس فيه سؤال اذا منكن:
ليه انحرفت ورحت اسرئيل ياوليدي الله يصلحك وهـ بس؟؟

هذا إنتي قلتيهـا بنفسـك .. عربي أصيــل .. جمايلـهـ مهب تـدوم أبــد :d

لاتحرمنا من روائع قلمك ودمت

يسلمتـس ربي ياجــدتي


أ. هـ. ب

[اهاا بس اهاا]

loty spot


:.:


هههههههههههههههههههههههههههههههه

خخخخخ احلى شي قرش يعزك لاا باقي شوي وتجلسوون تمزحوون مع بعض يغزك وتغززه

ياخيي وش فييك تنحااش منه تراا يبي يلعب معك طييره خخخـ

انا لو ماكنـت مستعجـل وابي ارجـع الديـرهـ بـدري .. كان فليتهـا معـه .. وكونـت معهـ صداقـة عابـرهـ :d


اي طيب زييين انك عاارف ومعترف .. بحاالكم ..

طبعاا لازم تدخلوون ذي السالفه في الموضووع ولا مااش مازبط معكم

الله يعيينكم على نفسكم

اللهـم آميــن

آحيانا كثيــرة آحس إني نفسيــهـ وماهضـم نفسي :d
ونفـس الشيء لـ بعـض الزمـلاء والشلـهـ النايمــه .. مادري وش سنعهـم بالحيــاة :d


مبرووك على الزوااج

الله يباركـ بعمرتـس وخيتـي :shy:


تعاال سؤاال غبي ولا انا ملخبطه ولا مدري وش السالفه ..
هذاا كلله انت تمشي برجوولك ..؟؟؟؟

لا والله مهب سؤال غبي .. يمكـن سؤال تعجبي أو استفهامي جديـر بالذكـر
أو يمكـن منسـوب التعجـب عنـدكـ زايـد حبة ونـص .. لذلكـ اختصـر السالفـة وآجاوبكـ ع تساؤلكـ بـ أي نعـم برجولي :d واحيـان شويـه .. رجولي ويديني لاجيتنـا آسبـح :tongue:

تقبل ردي و ننتظر جدييدك ..

حياتـس ياجـدتي



أ. هـ. ب

[اهاا بس اهاا]

جـدي خليــك بالشــارع


:،:

تو ما نور المنتدى اهاا بس اهاا
منورن فيكـ وباهلـهـ ياجدي

وكانك تبي رايي بصراحه الموضوع خفيف دم وتملك الموهبه للكتابه الساخره بس ما كان
في الموضوع قصة معينه

شهـادة آعتـز فيهـا من خبيــر الروايـات الساخــرهـ

والحين نروح للاقتباسات

مشينــا يامعلــم

وآسمحلي آقتبـس من تعليقــك مايستحــق التعليـق عليــه .. دون نقصـان في الباقي


للأسف يا صديقي اهااا بس اهااا القصة ما اجيزها للتثبيت

مادامهـا دون المستـوى المطلـوب .. جعــل عمـر أمهـا ماتثبـتت .. وشولـهـ تتثبـت آصـلا :d


لأني اتوقع يجي منك اقوى من كذا ولأنك بالفعل قادر على أقوى من كذا ان شاء الله ..

إن شاء الله .. ومثـل ماقلـت في أول الموضـوع .. إن هالحـواق اللي كتبتـه كان أول تجربــة .. وفيـه آيضـا تجربـة ثانيــة .. لكــن التعليقـات اللي جات عليهـا .. حسستنـي إني قليــل أدب وماستحـي على وجهـي .. ع العمــوم أنا بنزلهـا مرتـن ثانيـة هنـا .. وآنتظـر [ نقدكـ .. توجيهاتكـ .. إفاداتكـ .. نصايحكـ ]


ولكن يبيلك طول نفس ومخمخه اكثر وتعتيق للموضوع وقراءة اكثر لقصص ساخرة لناس يعجبونك

مثـل ماقلـت إنه يبيلـه طول نفـس ومخمخمـه .. ومن ناحيـة قراءة اكثـر لقصص ساخـرهـ .. والله ماهنـا اهتمـام واجـد بالقصص الساخـرهـ إلا لـ كـذا كاتـب كبيـر .. أنت واحـدن منهـم

بس ودي آطـرح تسـاؤل بسيـط .. يمكـن تقـول وش يبي ذا .. بس تقبلـهـ مني بصـدر رحـب مثل ماخبرتكـ طال عمـركـ

تساؤلي يقـول /-

الحيـن إنت لا انفردت بعمركـ وهاضت قريحة الكتابة عندكـ .. كم تاخذ معكـ من الوقـت .. يعني مآدري تقدر تجيبها في يومها .. أو تاخذ منكـ أكثـر من يوم .. وايضا وش الأفضـل .. الحرص على انها تخلـص بيومهـا .. أو متى ماخلصـت تخلـص .؟



مابي اجاملك وانصب عليك لأن هذا الشي ما راح يخليك توصل للي تبيه دامك حاب الشغله ..

فعـلا ياخوكـ والله صدقت .. تبي تعـدم اللي حاب شغلهـ .. جامله حتى لو هو على خطأ .. وياجعـل درربكـ خضـر على هالصراحـة ياعمـي .. وآبـدن خـذ راحتكـ لاتجامـل .. لو توصـل الأمـور معكـ إنكـ تشرشـح .. فـ شرشـح يابعـد كل من شرشحنـي :d


انك طلبت التوجيه وحبيت اكون صادق معك ..

ياعسـاكـ تسلــم وتعيــش ياخليكـ بالشــارع


ترى الدعوه شباب وفله والزعل عندنا مرفوض

انت عـارف إن ماكثـر الله إلا المنتديـات .. لكـن فيهـا شيء بايـخ ماصـل .. تـذب كلمــة .. يزعلـون كلهـم .. يعني لازم تحسـب ألـف حسـاب مع أي عضـو تمازحـه .. يعني زعولييين ملوليييين بشكـل لايطـاق .. والله لايجعـل منتديات عائلة فيتوتشيني من نمونـة هالمنتديـات


وأخيراً اخوك مبسوط كثير بتسجيلك معنا وبانتظار جديدك المسكت ان شاء الله

وأنا أكثـر والله ياخليكـ بالشـارع .. ماتتخيــل وش كثـر استانسـت يوم طحـت على منتـداكـ .. حتى إني مسوي بحـث لـ برنامـج .. وما حصلتـهـ كامـل إلا عندكـم هنيـّا


وعسى الله يقدرني على رد جمايلكـ يالغالي .. وإن شاء الله ماراح تشـوف إلا كل علمـن يسـركـ


تقبـل فآئـق مودتي وآحترامي


أ. هـ. ب

[LoLa LiciouSeS]

أقــــــــــــول ياخليك بالشارع ورا ماتهجد وتروق


خل الناس يبدعووون:d


نتفت القصه تنتيف وماخليت فلسفه ماتفلسفتها:humm:



ماعليك منه بس يا آها بس آها<<<<هذي اللي ناويه على عمرها:d



شوف ياخوي..


من حكم خبرتي بالأدب الإنجليزي,,وعلاقتي الوطيده مع ابو شكس<<ماتقصد شكسبير:d


حيث أستفدت من حنكته الروائيه واساليبه الكتابيه الكثير:5eshah5abeetah:


أقولك إن قصتك متعوب عليها:d


هيا بنا نسري للإقتباسات


هم اقتباسين لا اكثر:gam6ah:<<<اشمعنى:d



قـررت اروح مـع طريـق كـرا .. يـوم وصلـت الهـدا .. وانا اللي اوقـف عنـد مباسـط قبـل نزلـة كـرا .. يبيعـون فواكـه وخضـار وبعضهـم يبيـع قيـرو


الحين القيروا هو نفسه القات اللي يخزنونه اليمنااا<<<بررره:d



يالله بروح لحرمتـي تحترينـي في زاويــة التوقيــف عندنـا سالفــة ماتصلــح للنشــر .. ماغيـر ساعـة بس


يغلق الموضوع وينقل للكاتراز بس عشان هالجمله:7arrah:



,,,,,,,,,,,,,,,,,,,,,,,,,,,,,,



شد حيلك وأبدع يجي منك بصراحه :rose:



تـشــاو

[مزعلة النسـا]

ياحليلك ياأهاااا ..

موضوعك حلو ولاكن <== بتمسك فيك خط ملعون جدف <== اموت واعرف منهو جدف:gam6ah::d

اولا حياااااااااااااك الله في عايلتنا .. ومنور بروكلين اخوي :)

قصتك الصراحه قصه :gam6ah: مسكت فينا خط روحه بدون رجعه <== بدت تفلسف :tongue:

يعني انا الصراحه ماحسيت بمتعه وانا اقرا .. حقيقه والله .. يعني سكة سفر والمحطات اللي وقفت فيها والسوالف اللي صارت عند كل محطه غير مترابطه .. جلست اقول والمطلوب يعني .. وكل مانقلت سطر عن سطر يصير وجهي كذا :gam6ah: ..

بس الغريب رغم كل هذا احس بيصير لك مستقبل مو هين مدري ليه :ok:..

بالتوفيق خيو .. وصدقني القصه اللي بعدها راح تفرق علينا كثيييييييييييير لو اخذت بكلام المعزب .. لانه حلل اللي براسي من باب خبرته بهالمواضيع ..

صحيح اني ما أعرف اكتب هالنوعيه من القصص لاكني متذوقه جيده لهالنوعيه من الكتابات ..

بالتوفيق وفالك البيرق <== شطحت مثل شطحاتك:d :d

[خليك بالشارع]

ودي آطـرح تسـاؤل بسيـط .. يمكـن تقـول وش يبي ذا .. بس تقبلـهـ مني بصـدر رحـب مثل ماخبرتكـ طال عمـركـ

تساؤلي يقـول /-

الحيـن إنت لا انفردت بعمركـ وهاضت قريحة الكتابة عندكـ .. كم تاخذ معكـ من الوقـت .. يعني مآدري تقدر تجيبها في يومها .. أو تاخذ منكـ أكثـر من يوم .. وايضا وش الأفضـل .. الحرص على انها تخلـص بيومهـا .. أو متى ماخلصـت تخلـص .؟

أ. هـ. ب

مع اني اعتبر نفسي قاعد افضح اسرار مهنتي ولكن غالين والطلب يرخصلكم :d

كانت لي محاولات متواضعه بديتها وانتهيت منها في يوم واحد ثم استعجلت ونشرتها .. ما كانت ترتقي لأي مستوى .. اكتشفت بعدين مع مرور السنين وكثرة الممارسة ان الي نشرته كانت مجرد فكرة قصة وليست قصة :d

نقدر نقول يعني مثل هالقصة :

http://www.mamdou7.com/articles.php?action=show&id=10
:shy:

ولكن عندك هالقصة مثلاً قعدت اكتب فيها 7 شهور :d

http://www.mamdou7.com/articles.php?action=show&id=4

وهذي بعد ما نقدر نقول انها كانت مسكته لأني كنت في ذاك الوقت في بداياتي ولكن الي خلاها احسن شوي من الجميلة والتمساح اني مخمخت عليها اكثر ..

لكن لاحظ اسلوبي في ذا القصة :shy:

http://www.mamdou7.com/articles.php?action=show&id=12

وذا القصة بعد : http://www.mamdou7.com/articles.php?action=show&id=13

ولو اني اشوف قصة I Know What You Did Last Summer اكثر قوة ..

الوصف صار فيهم دقيق جداً لدرجة انك كقارئ يمكن صرت قادر تتصور المشهد الي انا قاعد اقصه بالقصة مرسوم قدامك بوضوح شديد وبأدق تفاصيله على الرغم من ان القصة كفكره غبية وماصلة جداً ولكن اعتبر نفسي تمكنت بنسبة 90% من حبكها بطريقة شدت القارئ الى النهاية .. الا اذا كان يزهق من قراءة القصص الانترنتية الطويلة نسبياً ..

وطبعاً كتابة كل وحده منهم اخذ مني اسابيع ما يتعدون الأربع اسابيع بالكثير .. وطبعاً هذا يجي مع كثرة الممارسة .. وكل ما صرت متمرس اكثر كل ما صرت اسرع بالكتابة وباتقان .. وبيتبرمج مخك على اسلوبك وتفكيرك المعتاد في الكتابه الا عاد اذا حبيت تسويله ابقريد :d ( ترقيه وتطوير ) وذلك بتعمقك بقراءة روايات لكتاب عباقره مثل روايات دان براون المترجمه للغة العربيه والكثيرون غيره وهكذا دواليك :rose: ..

واي استفسار ثاني انا حاضر :) ..

[MR.B!G.M]

ههههههههههههههههههههه

ااها بس ااها... شكلك كنت فآضي بقوة

والله قصة فلهـ.,. بس ما تعبت وانت تمشي


وبداية قوية اجدد من جدا <--- اروح على اجدد انا

[AhMaD]

والله حلوة يا اها بس اهاا ولك مستقبــل باذن الله ،،




مشكووووور

[أميرة الاحساس]

الله على رحله الحلميه ..

اقول وراك مامريتنا بجده ..؟؟..

ع العموم الى الامام يااها وبدايه جيده وموفقه وراائعه ..

[عـ‘َـطـ‘َـر ودفـ‘ًـآ‘]

اسلوبك حلو ومشوق لكن يبيلك قصه صح

واضح انك تعبت بالتأليف لكن القصه سامجه وطويله على عالفاضي

عالعموم بالتوفيق لاعدمناك